Nshuti Innocent yitwaye neza! Uko Abanyarwanda bakina hanze bitwaye mu Cyumweru gishize

Duhereye muri Kenya ku wa Gatandatu, ikipe ya AFC Leopards ikinamo Gitego Arthur yanganyaga na Murang'a SEAL igitego 1-1 muri shampiyona.

Muri uyu mukino uyu rutahizamu yabanje mu kibuga gusa aza gusimbuzwa utarangiye. Kugeza kuri ubu AFC Leopards iri ku mwanya wa 6 ku rutonde rwa shampiyona, ikaba izasubira mu kibuga ikina na Kariobangi Sharks ku Cyumweru.

Muri Libya ku wa Kane ikipe ya Al Ahly Tripoli ikinamo Manzi Thierry yatsindaga Al Khums ibitego 3-0. Kuri uyu mukino ntabwo uyu myugariro yakoreshejwe dore ko afite ikibazo cy'imvune amaranye iminsi.

Al Ahly Tripoli iri ku mwanya wa 1 ku rutonde rwa shampiyona, izasubira mu kibuga ku munsi w'ejo ku wa Kabiri  tariki 28 Mutarama 2025 ikina na Abi Al Ashar.

Ku wa Gatanu w'Icyumweru gishize muri shampiyona y'icyiciro cya mbere muri Tunisia, ikipe ya Olympique de Beja ikinamo Ishimwe Anicet yanganyaga na Esperance 1-1.

Muri uyu mukino ntabwo uyu mukinnyi w'Umunyarwanda yigeze akoreshwa gusa yari ku ntebe y'abasimbura. Olimpique de Beja izasubira mu kibuga ikina na AS Gabes ku Cyumweru ,kugeza ubu iri ku mwanya wa 8 ku rutonde rwa shampiyona.

Muri Afurika y'Epfo,ku munsi w'ejo ku Cyumweru nibwo ikipe ya Kaizer Chiefs ikinamo Ntwari Fiacre yatsindaga Free Agents ibitego 4-0 mu irushanwa rya Nedbank.

Ntabwo uyu munyezamu w'Amavubi yigeze akoreshwa kuri uyu mukino dore ko atarari no ku ntebe y'abasimbura. Kaizer Chiefs izasubira mu kibuga ikina Orlando Pirates muri Soweto Derby ku wa Gatandatu.

Ku wa Gatanu w'icyumweru gishize,muri shampiyona y'icyiciro cya mbere muri Azerbaijani ikipe ya Zira FK ikinamo Mutsinzi Ange yatsindaga Shamakhi ibitego 2-1.

Uyu myugariro w'Amavubi yari yabanje ku ntebe y'abasimbura gusa aza kwinjiramo asimbuye ku munota wa 77. Kugeza ubu Zira FK iri ku mwanya wa 3 ku rutonde rwa shampiyona, ikaba izasubira mu kibuga ikina na Qarabag ku Cyumweru.

Muri iyi shampiyona kandi ku wa Gatandatu ikipe ya Sabail FK ikinamo Nshuti Innocent yatsindaga Kapaz igitego 1-0.

Uyu rutahizamu w'Amavubi yabanje mu kibuga ndetse ni nawe watanze umupira  waje kuvamo iki gitego cyabonetse ku munota wa 11. Iyi kipe ya Sabail FK yahise iva ku mwanya wa nyuma ikaba izasubira mu kibuga ikina na Turan ku wa Gatandatu.

Muri shampiyona y'icyiciro cya mbere mu Bubiligi, mu munsi w'ejo ku Cyumweru ikipe ya K. Beerschot V.A ikinamo Hakim Sahabo yanyagirwaga na Royale Union Saint-Gilloise ibitego 4-0.

Uyu mukinnyi w'Umunyarwanda yari yabanje mu kibuga gusa aza gusimbuzwa ku munota wa 78. Kugeza ubu K. Beerschot V.A. iri ku mwanya wa nyuma ku rutonde rwa shampiyona, ikaba izasubira mu kibuga ikina na Genk ku wa Gatandatu.

Muri shampiyona y'icyiciro cya kabiri mu Bubiligi ku munsi w'ejo ku Cyumweru, ikipe ya Raal La Louviere ikinamo Samuel Gueulette yatsindwaga na Club NXT U23 ibitego 2-1. Nk'uko bisanzwe uyu mukinnyi w'Umunyarwanda yari yabanje mu kibuga ariko yaje gusimbuzwa ku munota wa 88.

Kugeza ubu Raal La Louviere iri ku mwanya wa 3 ku rutonde rwa shampiyona, ikaba izasubira mu kibuga ikina na Zulte Waregem ku Cyumweru.

Muri shampiyona y'icyiciro cya mbere muri Ukraine, ikipe ya FC Kryvbas Kryvyi iri kwitegura gukina imikino ya shampiyona yo kwishyura iri muri Espagne abo kuri uyu wa Kabiri irakina umukino wa gicuti na Tromse yo muri Norway.

Nshuti Innocent witwaraga neza atanga umupira wavuyemo igitego