Urutonde rw'abagabo 10 b'Ibishongore bafite uruhara rukurura abagore ku Isi -AMAFOTO

Nk'uko bimenyerewe buri mwaka, mu mpeza zawo hagenda hakorwa intonde z'abahize abandi mu buranga mu ngeri zose. Mu minsi ishije hasohotse urutonde rw'abagabo 10  b'Ibishongore  bakurura igitsina gore kurusha abandi mu myidagaduro mpuzamahanga, ndetse hanakorwa n'urundi ruriho abafite ibigango kurusha abandi.

Ubu hamaze gusohoka urutonde rw'abagabo 10 b'Ibishongore  ku Isi bafite uruhara. The New York Post yatangaje ko SEO Agency Reboot isanzwe itegura ibijyanye no gutora umugabo w'Igishongore  ku Isi ufite uruhara, yamaze gutangaza uwatorewe uyu mwanya muri uyu mwaka wa 2023 ari Prince William.

Uretse kuba Prince William ariwe watorewe kuba umugabo w'Igishongore  ufite uruhara, ni nawe uri ku mwanya wa mbere mu byamamare 10 bifite uruhara n'uburanga burangaza igitsinagore.

Dore abagabo 10 bafite uruhara beza ku Isi mu 2023 biganjemo abanyamerika bazwi mu myidagaduro:

1. Prince William

Igikomangoma cy'u Bwongereza, William akaba n'imfura y'Umwami Charles wa III, niwe waje ku mwanya wa Mbere. Ku manota 9.88, Prince William yabaye umugabo wa mbere ufite uruhara uhiga abandi. Uyu mugabo w'imyaka 41 ngo benshi bakunze gushakisha amafoto y'uruhara rwe kuri 'Google'.

2. Vin Diesel

Umukinnyi wa filime w'icyamamare Vin Diesel wakunzwe cyane muri filime zitandukanye zirimo nka Fast & Furious guhera ku gice cya 1, Guardian Of The Galaxy, The Triple X hamwe n'izindi nyinshi zamugize umwe mu bakinnyi ba filime binjiza agatubutse muri Hollywood, yaje ku mwanya wa Kabiri n'amanota 8.81 mu bagabo b'Ibishongore bafite uruhara.

3. Jason Statham

Umwongereza kabuhariwe mu gukina filime z'imirwano, Jason Statham, wakunzwe muri filime zirimo nka 'Transporter', 'Safe', 'The Meg' 'Expendables' n'izindi niwe uri kumwanya wa Gatatu mu bagabo 10 b'Ibishongore bafite uruhara n'amanota 8.51.

4. Samuel L.Jackson

Icyamamare muri Sinema, akaba n'umwe mu birabura bahagaze neza i Hollywood,Samuel Leroy Jackson, uzwi cyane muri filime nka 'Pulp Fiction', 'The Hateful Eight', 'Coach Carter' hamwe n'izindi nyinshi yakinnye ziganjemo izikorwa na Malvel's Studios. Uyu mugabo w'imyaka 74 yaje ku mwanya wa kane mu bagabo 10 b'Ibishongore  bafite uruhara n'amanoto 7.31 ku 10.

5. Jeff Bezos

Umuherwe wa Gatatu ku Isi, Jeffrey Preston Bezos, washinze kompanyi ya Amazon iri muzinjiza menshi ku Isi, niwe waje ku mwanya wa gatanu mu bagabo 10 b'Ibishongore  bafite uruhara mu 2023. Bezos w'imyaka 59 utunze akayabo ka miliyari 169 z'amadolari, yaje kuri uyu mwanya n'amanota 7.12 ku 10.

6. Michael Jordan

Kizigenza mu mukino wa Basketball, Michael Jordan, yanditsemo amateka mbere y'uko awuhagarika, niwe uri ku mwanya wa 6 mu bagabo 10 bafite uruhara kandi bakundwa n'igitsinagore. Ku myaka 60 y'amavuko Michael Jordan yagize amanota 7.10 ku 10.

7. The Rock

Dwayne Johnson wamamaye ku izina rya 'The Rock' yakoreshaga mu rwambariro ubwo yaragikina imikino yo kumvana imbaraga, ubu asigaye ari umukinnyi wa filime byahiriye afatanya n'ubucuruzi. Uyu mugabo w'imyaka 51 y'amavuko yaje ku mwanya wa karindwi n'amanota 6.90 ku 10.

8. Shemar Moore

Umukinnyi wa filime wanahoze akora kuri televiziyo ya BET, Shemar Franklin Moore, niwe waje ku mwanya wa 8. Uyu mugabo wamamaye muri filime zirimo 'Criminal Minds', 'The Young & The Restless', kuri ubu akunzwe muri filime y'uruhererekanye y'imirwano yitwa 'S.W.A.T'. Shemar Moore w'imyaka 53 yagize amanota 6.75 ku 10.

9. Shaquille O'Neal

Uyu mugabo w'umunyabigwi muri NBA, uzwi cyane ku izina rya 'Shaq' yaje ku mwanya wa Cyenda  Ku myaka 51 y'amavuko Shaquille O'Neal yagize amanota 6.60 ku 10.

10. Terry Crews

Umukinnyi wa filime Terry Alan Crews, akaba n'umwe mu bashyushya rugamba mu marushanwa ya 'America Got tTalents', niwe waje ku mwanya wa cumi mu bagabo b'Ibishingore bafite uruhara. Ku myaka 55 y'amavuko, Terry Crews, yagize amanota 6.32 ku 10