Joe Biden yahamije ko natorwa mu matora ya 2024 azageza America ku bukungu yarotaga

Kuri uyu wa Gatatu muri Chicago, muri Leta ya Illinois, Perezida wa America Joe Biden yagaragaje gahunda yashyizeho ya “Bidenomics” igamije kuzamura ubukungu bwa America ku rwego rwo hejuru, ndetse asobanura politike ye ishyigikira ishoramari n’amasosiyete atandukanye.

Umuyobozi mukuru wa America, Biden yavuze ko ibyo akora byose biri mu nyungu za America kuko yifuza kuyizamura agatsinda na bya bindi byananiranye yaba muri Leta za kera n’iza vuba mbere y'uko ayobora.

Biden yatangaje ko yifuza kuzamura ubukungu bwa America mu bice byose biyigize, kandi bukaba butajegajega mu bihe byose.

Ubwo yagarukaga ku matora ateganijwe umwaka utaha, yavuze ko igihe azaba yatowe azashyira mu bikorwa ibyo yasezeranye birimo kuzamura inzego zitandukanye zirimo n’ubukungu.

Bamwe ntibemera ibitekerezo bya Bieden ariko we akomeza avuga ko ibyo yasezeranye azakomeza kubishyira mu bikorwa.

Byaragaragaye ko ubukungu bwa America bwahungabanye kubera Icyorezo cya Covid-19, ibikorwa byo kwihangira imirimo biragabanuka, habaho guta agaciro k’ifaranga n’ibindi bibazo.

Aljazeer itangaza ko Umuyobozi wa Banki Nkuru y’Igihugu, Jerome Powell, yavuze ko ubukungu bwa America buhagaze nabi. Nyamara mu kiganiro n’itangazamakuru, Perezida Biden yatangaje ko yiteguye guhangana n’iki kibazo cy’ubukungu akabuzahura.

Mu itangazo ryashyizwe ahagaragara ku wa Gatatu, White House yagaragaje inkingi eshatu za gahunda ya Biden yiswe “Bidenomics”, ivuga ko Iya mbere ari ugushora imari mu bikorwa bya America;

Iya kabiri ikaba kwigisha abaturage kwaguka mu bikorwa byabo, iya gatatu ikaba kugabanya ibiciro bya bimwe bikenerwa umunsi ku munsi, no gufasha ba rwiyemezamirimo mu bucuruzi buciriritse bagatera imbere.”