Uwakiniye APR BBC yatoranyijwe mu bazakina NBA G League all Stars

Uyu mukino ni umwe mu y’ingenzi muri NBA G-League, aho abakinnyi b’abahanga bagaragaza ubushobozi bwabo imbere y’abakurikiranira hafi impano nshya mu mukino wa Basketball.

Miller, wanyuze mu Rwanda mu mwaka w’imikino ushize, yagaragaye nk’umukinnyi ukomeye ubwo yafashaga APR BBC kwegukana igikombe cya shampiyona. Ubuhanga bwe bwo kwinjiza amanota no gukina atsinda byatumye afatwa nk’umwe mu bakinnyi b’ingenzi APR BBC yagize mu myaka ya vuba aha.

Nyuma yo kuva muri APR BBC, Miller yerekeje muri Austin Spurs, ikipe ishamikiye kuri San Antonio Spurs muri NBA. Mu mikino 28 amaze gukina muri uyu mwaka, yigaragaje cyane kuko afite impuzandengo y’amanota 16 n’rebounds esheshatu kuri buri mukino.

Byongeye kandi, Miller ari mu bakinnyi bahagaze neza mu bijyanye no kwambura imipira (steals), aho abarirwa 2.62 kuri buri mukino, bimushyira ku mwanya wa gatatu muri G-League. Uyu musaruro mwiza niwo watumye ahembwa amahirwe yo kwitabira umukino w’intoranywa, aho yatoranyijwe mu bakinnyi 17 bagizwe n’abahize abandi mu mwaka w’imikino.

Uyu mukino uteganyijwe ku Cyumweru tariki ya 16 Gashyantare 2025. Abakinnyi 28 bazitabira iyi mikino bagabanyijwe mu makipe ane agizwe n’abakinnyi barindwi, aho bazakina imikino ya ½, hanyuma abatsinze bahurire ku mukino wa nyuma ugamije gutanga igikombe.

Miller wakiniye APR BBC yatoranyije mu bakinnyi bazakina NBA G League All Stars

Mulles akina muri Austin Spurs ishamikiye kuri San Anonio Spurs ikina NBA