M23 yiyemeje gukomereza i Kinshasa, yita Tshisekedi igisambo

Ibi Umuyobozi wa AFC/M23,Corneille Nanga yabigarutseho mu kiganiro n’abanyamakuru cyabaye kuri uyu Wa Kane tariki ya 30 Mutarama 2025

Yavuze ko bari i Goma kandi bazahaguma ndetse bakazanakomeza bagana i Kinshasa kugeza igihe ubuyobozi buzakemurira ibibazo.

Ati "Twebwe baradukura aha kugira ngo tujye he ko ari iwacu? Turi hano kandi tuzahaguma, ndetse tuzanakomeza tugana i Kinshasa kugeza igihe ubutegetsi bwa Tshisekedi buzakemura ibibazo byacu''.

Ku bijyanye niba bazashobora gutsimbarara bakirengagiza igitutu cy’amahanga nka Amerika abasaba kuva i Goma,Col Nanga yagize ati " New York ni New York, Goma na yo ni Goma. Twebwe dufite ibibazo by’abaturage badafite amazi, badafite umuriro ndetse n’ibibazo by’ubwicanyi byakomeje kubera aha, ni byo duhanganye."

Yavuze ko Congo ari Leta yapfuye,ikaba yarabaye agatogo kandi bikaba ibyo byose bifite ibibazo ariko igashaka kubyegeka ku Rwanda.

Yagize ati " Hano hari Sudani y’Epfo, Uganda, Burundi, Angola, Zambiya, Abanyafurika y’Epfo, Abatanzaniya, Ingabo z’Abacanshuro barenga igihumbi. Ufashe abasirikare ba MONUSCO barenze ibihugu makumyabiri.Congo mbese yabaye Agatogo, kandi ibyo byose bifite ibibazo byabyo. Kuki bashaka kubyegeka ku Rwanda?".

Corneille Nanga yakomeje avuga ko Tshisekedi ari igisambo ati" None rero twe turi abakongomani bari muri Congo, kuki ibyo bihugu byose? Ni uko Tshisekedi yakuyeho Leta, akuraho ubutabera. Yazanye amacakubiri. Ni Igisambo, ni umu escrot".

Yavuze ko ibi byose babishyira ku Rwanda kandi mu by'ukuri iyo umukongomani atariye aba atari ukubera rwo. Ati" Ibibazo byose babishyira ku Rwanda. Iyo umukongomani atariye ni ukubera u Rwanda?.Tekereza"

Umuyobozi wa M23 yavuze ko impunzi z’abanyecongo zigomba gutaha kandi bakazabana neza n’ibihugu baturanye.

Ku kibazo cy’ amashanyarazi, atangaza ko Kinshasa yahagaritse amashanyarazi, amazi meza na Interineti ariko bo bihaye amasaha 48 ibibazo bikaba byakemutse.

Yasabye abantu gusubira mu mirimo bakarindirwa umutekano, asaba abahoze bavuga nabi M23 kuza bagakora akazi kabo kuko ntacyo izabakurikiranaho.

Corneille Nanga yavuze ko bazakomeza n'Ikinshasa kugeza igihe ubutegetsi bwa Tshisekedi buzakemurira ibibazo byabo