Qatar 2022: Nyuma y’imyaka 12 Ghana yahawe amahirwe yo kwihorera

Ku mugoroba wo kuri uyu wa Gatanu tariki ya 1 Mata 2022, habaye tombora y’uburyo amakipe agabanyije mu matsinda y’igikombe cy’Isi 2022, yasize Uruguay yabujije amahirwe Ghana kuba ikipe ya mbere muri Afurika yanditse amateka yo kugera muri ½ mu gikombe cy’Isi cyabereye muri Afurika y’Epfo.

Iyi tombola yasize Ghana na Urguay zihuriye mu itsinda rya H, ririmo Portugal na Kareya y’Epfo.

Ghana na Urguay bafitanye amateka yihariye kandi akomeye yagaragaye mu 2010 mu irushanwa ry’igikombe cy’Isi cyabereye muri Afurika y’Epfo.

Mu gihe benshi mu bakunzi b’umupira w’amaguru muri Afurika batekerezaga ko Ghana igiye kuba igihugu cya mbere muri Afurika kigiye gukora amateka yo kugera muri ½ mu gikombe cy’Isi 2010, Luis Suarez yakuyemo umupira n’amaboko watewe na Dominique Adiah mu gihe umunyezamu yari yamaze kuryama ku butaka, Ghana ihabwa penaliti yahushijwe na Asamoah.

Ghana yaje gusezererwa muri za Penaliti, Suarez aba intwari ya Uruguay.

Guhera icyo gihe kugeza magingo aya, ubukeba no guhangana hagati y’ibi bihugu aho byahuriye hose byakajije umurego ndetse binagaragarira amaso ya rubanda.

Nyuma yuko habaye tombora y’uburyo amakipe azahura mu matsinda y’igikombe cy’Isi kizabera muri Qatar, Uruguay ikisanga mu itsinda rimwe na Ghana, benshi mu bakurikira umupira w’amaguru ku Isi bibajeje niba Ghana izihorera kuri Urguay.

Ni umwanya mwiza ku ikipe y’igihugu ya Ghana’Black Stars’ wo kwihorera no guhanagura imitima y’abafana bababajwe na Urguay mu myaka 12 ishize.

Imikino y'igikombe cy'Isi izatangira tariki ya 21 Ugushyingo irangire tariki ya 18 Ukuboza 2022, ikazabera mu mijyi itandukanye igize igihugu cya Qatar.

Suiarez yababaje abanya-Afurika bose ubwo yagaruzaga uyu mupira ibiganza

Uruguay yabujije Ghana amahirwe yo kugera muri 1/2 cy'igikombe cy'Isi

Ghana yahawe amahirwe yo kwihorera kuri Urguay