Carlo Ancelotti ari gukubita agatoki ku kandi mbere yo gucakirana na FC Barcelona

Uyu mukino wa Super Cup uteganyijwe ku Cyumweru muri Jeddah, Saudi Arabia, uzaba ari Clasico ya kabiri y’uyu mwaka, aho Madrid ishaka kugarura icyubahiro yambuwe na FC Barcelona iyitsinda 4-0.

Nubwo yatsinzwe mu Ukwakira, Real Madrid yabashije kwisubiraho koko igiye gukina Super Cup iheruka gutsinda imikino itanu yikurikiranya.  

Mbere yo gukina na Fc Barcelona, umutoza wa Real Madrid yagize ati “Tugomba kwibuka ibyabaye mu mukino ubanza kuko badutsinze muri LaLiga. Clasico ihora ari umukino ukomeye, ariko kuba ari umukino wa nyuma bikongera igitutu cy’umwihariko.”

Jude Bellingham, umukinnyi wo hagati ukomoka mu Bwongereza yagaragaye mu mukino wa 1/2 wa Super Cup atsinda igitego cya mbere mu ntsinzi ya 3-0 batsinze Mallorca. 

Nubwo yari yagize ikibazo cy’imvune yoroheje, Ancelotti yavuze ko ameze neza kandi yiteguye gukina. Bellingham ni umwe mu bakinnyi bafite uruhare runini muri Real Madrid, kuko ari uwa gatatu mu batsinze ibitego byinshi mu mwaka wa LaLiga wa 2023/24, kandi anganya na Vinícius Jr ku mwanya wa mbere mu gutanga imipira ivamo ibitego.

Carlo Ancelotti yavuze ko Super Cup ari igikombe gifite agaciro kadasanzwe kuri Real Madrid. Yagize ati: “Igihe cyose twagiye dutwara iki gikombe, umwaka wacu wagiye uba mwiza. Iyo tutagitwaye, ibintu ntibiba neza. Iki gikombe gitanga imbaraga n’ishyaka ku ikipe.”

Ancelotti yavuze ko Barcelona ari umwanzi wa kera kandi ko imikino bahuramo ihora ikomeye ku mpande zombi. ati: “Biragoye kuri twe no kuri bo. Ntabwo ushobora kwemeza uko umukino uzarangira.”

Umukino wa nyuma wa Super Cup hagati ya Real Madrid na Barcelona utegerejwe n’abakunzi b’umupira w’amaguru ku isi yose. Real Madrid izaba ishaka kwihorera no kugarura icyubahiro nyuma yo gutsindwa nabi mu mukino ubanza wa LaLiga, mu gihe Barcelona nayo ishaka gukomeza gutsinda umukeba w’ibihe byose.

Mu ikipe ya Real Madrid bafite intego yo gutsinda FC Barcelona kuri Super Cup

Carlo Ancelotti yiyemeje gutsinda FC Barcelona kuri iki Cyumweru