Rutsiro FC yashyiriweho intego y’amafaranga nitsinda Rayon Sports

Kuri uyu wa gatatu tariki ya 03 Ugushyingo 2021 saa cyenda zuzuye, Rutsiro FC irakira Rayon Sports kuri Stade Umuganda mu karere ka Rubavu mu mukino w’umunsi wa kabiri wa shampiyona y’u Rwanda.

Mbere yo kujya mu kibuga ubuyobozi bw’ikipe ya Rutsiro bwashyiriyeho amafaranga ibihumbi 50Frw kuri buri mukinnyi n’abatoza b’iyi kipe, nibatsinda Rayon Sports iri mu makipe ahabwa amahirwe yo kwegukana igikombe cya shampiyona uyu mwaka.

Ni ku nshuro ya kane aya makipe agiye guhura muri shampiyona, bwa mbere bahura hari tariki 8 Gicurasi 2021 Rayon Sports itsinda Rutsiro FC ibitego 2-0, bahuye ku mukino wa kabiri tariki ya 11 Gicurasi banganya igitego 1-1, tariki 22 Kamena 2021 bahuye bwa gatatu Rutsiro FC itsinda Rayon Sports ibitego 2-0.

Kapiteni wa Rayon Sports, Muihire Kevin yasabye abafana n’abakunzi b’iyi kipe kutumva ngo bahe agaciro amabwire, ahubwo bakwiye guha agaciro ibikorwa babereka mu kibuga ndetse bakabashyigikira kuko ariyo nzira yonyine izabageza ku gikombe.

Ku munsi wa mbere wa shampiyona y’u Rwanda, Rayon Sports yatsindiye Mukura i Kigali igitego 1-0, mu gihe Rutsiro FC yaguye miswi na Etincelles 0-0.

Buri mukinnyi wa Rutsiro FC arararana ibihumbi 50Frw nibatsinda Rayon Sports