Nawe byaramutunguye! Muka Jude Bellingham yagarutse ku byo gukundana n’abagabo 71

Kuva umwongereza Jude Bellingham yashyira ku karubanda umukunzi we mushya ariwe Ashlyn Castro, abakunzi b’uyu mukinnyi wa Real Madrid bamusamiye hejuru ari na ko havugwa inkuru uruhuri ku hahise h’uyu munyamerikakazi.

Igitangaje kuri uyu mukobwa w’imyaka 27 ni uko byavuzwe kenshi ko Jude Bellingham ari umugabo wa 71 ukundanye nawe, ndetse hagashyirwa hanze urutonde rw’ibyamamare byakanyujijeho nawe harimo nka Neymar Jr, Michael B. Jordan, Jamie Foxx, Lewis Hamilton, n’abandi.

Abonye inkuru zimaze kuba nyinshi, Ashlyn Castro yanyarukiye kuri TikTok ye ikurikirwa n’abantu ibihumbi 152 akora amashusho afite iminota 10 n’amasegonda 15, kugira ngo asobanure ukuri kuri ayo makuru amaze iminsi azenguruka imbuga nkoranyambaga.

Ashlyn avuga ko abantu bahimbye ahahise he, bakarema indangagaciro zitari zo, bakamwibasira, nta kintu na kimwe bagendeyeho cy’ukuri ahubwo byose ari ibinyoma gusa.

Ati: ”Uruhande rwose watekerezamo, abantu baranyibasiye, baramparabika, bantesha agaciro bagerageza gutera urugo rwa nyogokuru. Byari birenze urugero.”

Avuga ku byo gukundana n’abagabo basaga 70, yagize ati: ”Nagize abakunzi batatu gusa mu myaka umunani ishize. Mu 2017 nibwo nakundanye bwa mbere kandi uwo twakundanye yari icyamamare. Aho rero namenyereye abantu bamvugaho ibyo bashaka.”

Yakomeje ati: ”Nta kintu cyari kuri murandasi kivuga ku hahise hanze, abantu bagerageje kuzana ibintu bigaragaza urwango bamfitiye kubera uwo twakundanaga icyo gihe.”

Ashlyn Castro avuga ko Jude Bellingham ari umukunzi wa gatatu agize aho kuba uwa 71

Ashlyn Castro avuga ku kazi gatandukanye yakoze, yavuze ko yigeze gukora muri restaurant ndetse agasinyana na kompanyi y’imideri. Ndetse kandi uyu mukobwa yanagerageje gukora umuziki gusa ntibyamuhira agenda abishyira ku ruhande.

Uyu mukobwa kandi yanagaragaye mu ndirimbo z’abandi zitandukanye, ari ba bakobwa bagaragara mu ndirimbo bita ‘video vixens’ mu rurimi rw’icyongereza. Amafoto yagiye akurwa mu ndirimbo yagaragayemo, avuga ko yagiye akoreshwa mu kumuharabika.

Nyuma y’igihe kinini bivugwa ko Jude Bellingham akundana n’umuhorandi witwa Laura Celia Valk, mu minsi ishize ni bwo we na Ashlyn Castro bashyize ahagaragara iby’urukundo rwabo aho bagaragara kenshi bari kumwe haba ku kibuga ndetse n’ahandi.

Aslyn akunze kuza gushyigikira Bellingham ku mikino itandukanye