Abanyarwanda 5 mu bazasifura igikombe cy'Afurika cy'abatarengeje imyaka 17

Guhera tariki ya 30 z'uku kwezi kuzageza tariki ya 19 z'ukwezi gutaha nibwo mu gihugu cya Morocco hazaba hakinwa igikombe cy'Afurika cy'abatarengeje imyaka 17 ku nshuro ya 15.

Iri rushanwa rizasifurwa n'abasifuzi 64 muri rusange aho harimo 5 b'Abanyarwanda.Abo basifuzi barimo babiri basifura mu kibuga hagati aribo Rulisa Patience na Umutoni Aline. Abasifura ku ruhande ni Umutesi Alice na Ishimwe Didier mu gihe uwo kuri Video Assistant Referee(VAR) ari Abdul Twagirumukiza.

Amakipe y'ibihugu yabonye itike yo kuzakina iri rushanwa ni Morocco, Tanzania,Uganda na Namibia ari mu itsinda A ,Burkina Faso, Cameroon, Afurika y'Epfo na Misiri ziri mu itsinda B na Senegal,Gambia, Somalia na Tunisia ziri mu itsinda C.

Hari kandi ikipe y'igihugu ya Mali,Angola, Cote D'Ivoire na Centre Africa ziri mu itsinda D. Amakipe 10 azaba aya mbere azahita abona itike yo kuzakina igikombe cy'Isi cy'abatarengeje imyaka 17 cya 2025 kizabera muri Qatar.

Ikipe y'igihugu ya Senegal niyo ifite igikombe cy'Afurika cy'abatarengeje imyaka 17 giheruka aho yagitwaye itsinze Morocco ku mukino wa nyuma.

Abasifuzi 64 bazasifura igikombe cy'Afurika cy'abatarengeje imyaka 17