Ni umukire wa 4 muri Afurika! Ibyo wamenya kuri Dr Patrice Motsepe wongeye gutorerwa kuyobora CAF

Dr Patrice Motsepe yavutse tariki ya 28 Mutarama 1962, avukira i Johannesburg muri Afurika y'Epfo. Avukana n'umugore wa Perezida wa Afurika y'Epfo, Tshepo Motsepe.

Afite umugore witwa Precious Moloi ndetse n'abana batatu. Afite impamyabumenyi ya Kaminuza y'Ubusuwisi mu bijyanye n'ubugeni ndetse yize amategeko muri kaminuza ya Witwatersrand. Yize kandi ibijyanye n'ubucukuzi bw'amabuye y'agaciro n'amategeko y'ubucuruzi.

Nyuma yo kuva kwiga mu 1997 yaguze ibirombe bya zahabu 6 muri AngloGold kuri miliyoni 7.7 z'Amadorali iwabo muri Afurika y'Epfo.  

Iki gihe ni naho yahise ashinga uruganda rucukura amabuye y'agaciro arwita 'African Rainbow Minerals Limited' none kuri ubu rutunganya Toni 6.7 z'amabuye y'agaciro ku mwaka.

Uko iminsi yagiye igenda uyu mugabo ni ko yakoraga ubu bucukuzi bw'amabuye y'agaciro ari nako abukuramo amafaranga menshi maze mu 1999 akorana na bagenzi be bakora icyo bise 'Greene and Partners Investments'.

Muri 2004 yaje kugirwa umuyobozi mukuru wa Banki ya Absa Group ndetse anagirwa umuyobozi mukuru w'ikigo cy'ubwishingizi cya Sanlam.

Dr Patrice Motsepe yakomeje gushora imari mu bijyanye no gucukura ndetse n'ubucuruzi bw'amabuye y'agaciro ari nako aba umuyobozi mu bitandukanye none kuri ubu niwe muherwe wa 4 muri Afurika nk'uko biheruka gutangazwa n'ikinyamakuru Business Empires Africa.

Uyu mugabo w'imyaka 63 abarirwa kuba atunze miliyari 11.6 z'Amadorali. Dr Patrice Motsepe yatangiye kwinjira mu bintu bijyanye na siporo muri 2004 agura imigabane ingana na 51% mu ikipe ya Mamelodi Sundowns y'iwabo muri Afurika y'Epfo gusa nyuma biza no kurangira aguze imigabane yose.

Muri 2019 kandi yaguze imigabane ingana na 26% mu ikipe ya Rugby yitwa Blue Bulls Rugby Union y'iwabo mu gace ka Pretoria.

Muri 2020 ni bwo Dr Patrice Motsepe yatangaje ko aziyamamariza kuyobora CAF ndetse muri 2021 ahita anatorerwa kujya kuri uyu mwanya asimbuye Ahmad asimbuye Ahmad wagiyeho mu 2017.

Mu myaka ine amaze ari Perezida wa CAF, ibihembo by'amafaranga yatangwaga mu gikombe cy'Afurika yiyongereyeho 40% agera kuri Miliyoni 7 z'Amadorali.

Ntabwo ari ibi gusa kuko ibihembo by'amafaranga yatangwaga mu mikino ya CAF Champions League haba mu bagabo no mu bagore byariyongereye.

Yanatangije irushanwa rishya rya African Football League ryakiniwe ku nshuro ya mbere muri Tanzania rikegukanwa na Mamelodi Sundowns muri 2023.

Nyuma yo gutorerwa indi myaka ine, Dr Patrice Motsepe yavuze ko intego ari ugukomeza gutuma umupira wa Afurika uhatana ku rwego mpuzamahanga.

Dr Patrice Motsepe wongeye gutorerwa kuyobora CAF 

Dr Patrice Motsepe ni umukire wa 4 ku mugabane w'Afurika