Liverpool yahannye Southampton yashatse kuyikora mu jisho naho Manchester City bikomeza kwanga

Ni mu mikino yakinwe kuri uyu wa Gatandatu tariki 8 Werurwe 2025. Saa kumi nimwe ikipe ya Liverpool yari yakiriye Southampton kuri Anfield. Uyu mukino watangiye ikipe ya Liverpool ihererekanya neza ari na ko abakinnyi bayo barimo Curtis Jones barema uburyo imbere y'izamu.

Ikipe ya Southampton yakomeje kurushwa cyane mu bijyanye no kwiharira umupira ndetse ku munota wa 19 iza kuvunikisha Jan Bednark asimburwa na Armel Bella-Kotchap.

Abakinnyi ba Southampton bagiye banyuzamo bakagerageza uburyo imbere y'izamu barekurira amashoti kure.

Liverpool yakomeje gusatira cyane nk'aho ku munota wa 29 Ryan Gravenberch yahaye umupira mwiza Darwin Nunez wahise arekura ishoti mu izamu gusa umunyezamu wa Southampton, Aaron Ramsdale, aba ibamba.

Ku munota wa 45 Southampton yaje gufungura amazamu ku makosa yakozwe hagati ya Virgir na Allison Backer bananirwa gukuraho umupira birangira Will Smallbone awushyize mu izamu.

Mu gice cya kabiri ikipe ya Liverpool yaje ikora impinduka mu kibuga havamo Kostas Tsimikas, Curtis Jones na Dominic Szoboszlai hajyamo Alexis Mac Allister, Andrew Robertson na Harvey Elliot.

Ikipe ya Liverpool yakomeje gusatira cyane ishaka uko yakwishyura maze ku munota wa 52 Darwin Nunez arakibona ahawe umupira na Luis Diaz.

Bidatinze nyuma y'umunota umwe Darwin Nunez yahise akorerwaho ikosa na William Smallbone ari mu rubuga rw'amahina bituma hatangwa penariti yinjijwe neza na Mohammed Salah igitego cya kabiri kiba kirabonetse.

Liverpool yakomeje kwatsa umuriro imbere y'izamu maze bigeze ku munota wa 86 ibona penariti ku mupira myugariro wa Southampton, Sugawara Yukinari yari akojejeho intoki ari mu rubuga rw'amahina. 

Yahise yinjizwa neza na Mohammed Salah igitego cya 3 kiba kirabonetse. Umukino warangiye Liverpool itsinze Southampton ibitego 3-1.

Undi mukino wakinwe ikipe ya Manchester City yatsinzwe na Nottingham Forest igitego 1-0 cya Hudson-Odoi ku munota wa 83 ahawe umupira na Morgan Gibbs- White.

Kugeza ubu Liverpool iracyayoboye urutonde rwa shampiyona n'amanota 70 mu gihe Manchester City yo iri ku mwanya wa 4 n'amanota 47.

Ku munsi w'ejo ikipe ya Manchester United izakira Arsenal kuri Old Trafford Saa kumi n'ebyiri n'iminota 30.

Mohamed Salah yafashije Liverpool gutsinda Southampton