Real Madrid na Liverpool ahatambika! Imikino ya 1/8 cya UEFA Champions League yaje

Kuri uyu wa Kabiri Saa moya n'iminota 45 nibwo hatangira gukinwa imikino ibanza ya 1/8 cya UEFA Champions League gusa hari imikino itegerejwe na benshi kurusha indi.

Saa yine z'ijoro ikipe ya Real Madrid iraba yakiriye Atletico Madrid kuri Santiago Bernabeu. Real Madrid yageze hano nyuma yo gusezerera Manchester City mu mikino ya kamarampaka mu gihe Atletico Madrid yo yari yaje mu makipe 8 ya mbere.

Imibare yerekana ko ikipe ya Real Madrid yakunze gushobora iyi kipe basangiye Umujyi mu mikino ya UEFA Champions League kubera ko imikino 5 yo gukuranwamo iheruka yose yarayitsinze harimo n'imikino ibiri ya nyuma.

Uyu mukino w'uyu munsi uraba ari uwa 10 uhuje aya makipe yombi muri Champions League, bikaba inshuro nyinshi amakipe yo mu gihugu kimwe ahuye muri iri rushanwa nyuma ya Liverpool na Chelsea.

Inshuro 12 ikipe ya Real Madrid imaze guhuramo n'indi kipe baturuka mu gihugu kimwe mu mikino yo gukuranwamo ya UEFA Champions, yashoboye gukomezamo inshuro 10 usibye inshuro 2 gusa yasezerewe na FC Barcelona muri 1/2 mu mwaka w'imikino wo 1960/61 ndetse no muri 2010/11.

Mu mikino 17 yo gukuranwamo muri UEFA Champions League ikipe ya Real Madrid iheruka gukina yatsinzwemo umwe gusa, itsinda 11 naho inganya 5 gusa. Ni mu gihe mu mikino 9 iheruka yo itaratsindwa. Iheruka gutsindwa ubwo yatsindwaga na Manchester City 4-0.

Kylian Mbappé na Vinicius Junior ni bamwe mu bantu baraba bahanzwe amaso ku ruhande rwa Real Madrid. 

Mbappé mu mikino 32 iheruka yo gukuranwamo muri UEFA Champions League amaze gukina yatsinzemo ibitego 24, atangamo imipira 3 yabivuyemo. Aheruka gutsinda hat-trick akina na Manchester City aho yari iya kabiri kuriwe mu mikino yo gukuranwamo.

Vinicius Junior we mu mikino 8 amaze gukina muri UEFA Champions League muri uyu mwaka w'imikino afitemo uruhare rw'ibitego 9 aho yatsinzemo 7 akaba yaranatanzemo imipira ibiri yabivuyemo.

Ikipe ya Atletico Madrid imikino itatu iheruka yo gukuranwamo yagiye isezererwa. Bamwe mu bakinnyi bayo bo kwitega muri uyu mugoroba harimo Julián Alvarez dore ko mu mikino 8 iheruka muri UEFA Champions League afitemo ibitego 6.

Ni abakinnyi 2 bonyine kugeza ubu babashije gutsinda ibitego byinshi muri Champions League bari mu mwaka wa Mbere muri Atletico Madrid aribo Diogo Costa (2013-2014) ndetse na Vava (1958/59) aho bombi batsinze ibitego 8.

Real Madrid irakina idafite Jude Bellingham wabonye ikarita ya kane y'umuhondo mu gihe Éder Militão, Dani Carvajal, Dani Ceballos na Jesús Vallejo bagize ibibazo by'imvune.

Undi mukino utegerejwe na benshi ni uwo ikipe ya Liverpool izakiramo Paris Saint-Germain ejo kuwa Gatatu Saa yine z'ijoro kuri Anfield. 

Ni nyuma yuko Liverpool yasoje imikino ibanza ya UEFA Champions League ndetse ikaba yari no ku mwanya wa mbere naho Paris Saint-Germain yo bikaba byarasabye ko inyura mu mikino ya kamarampaka igasezerera Stade Brest.

Aya makipe yombi agiye guhuza ahagaze neza muri shampiyona kuko Liverpool iri kumwanya wa mbere muri Premier League aho irusha amanota 13 Arsenal iyikurikiye ndetse akaba arinako bimeze kuri Paris Saint-Germain aho yo mu mikino 24 ya Ligue 1 itaratsindwamo n'umukino n'umwe.

Imibare yerekana ko aya makipe yombi atakunze guhura cyane. Mu mikino 4 iheruka, Liverpool yatsinzemo 3 naho Paris Saint-Germain itsindamo umwe.

Baherukaga guhura muri UEFA Champions League mu mwaka w'imikino wa 2018/19 aho bahuriye mu matsinda maze Liverpool igatsinda umukino ubanza ibitego 2-1 naho uwo kwishyura ikawutsindamo ibitego 3-2 ndetse biza no kurangira ariyo yegukanye igikombe.

Indi mikino iteganyijwe uyu munsi Saa moya n'iminota 45,Club Brugge yo mu Bubiligi irakira Aston Villa yo mu Bwongereza kuri Jan Breydel Stadion,Saa yine z'ijoro Borussia Dortmund yo mu Budage yakire Lille yo mu Bufaransa kuri Signal Iduna Park naho PSV Eindhoven yo mu Buhorandi yo yakire Arsenal kuri Phillips Stadion.

Ku munsi wejo kuwa Gatatu Saa moya n'iminota 45, Feyenoord yo mu Buhorandi izakira Inter Milan yo mu Budage kuri de Kuip naho Saa yine z'ijoro FC Bayern Munich yo mu Budage yakire Bayern Leverkusen nayo yo muri iki gihugu kuri Allianz Arena naho Benfica yo muri Portugal izakire Arsenal yo mu Bwongereza kuri Estadio da Luz.