Rimwe rya Tunisia ringana na 441.48 Frw: Amafaranga afite agaciro kurusha andi muri Afurika

Uyu munsi, InyaRwanda yaguteguriye amafaranga afite agaciro karusha ayandi ku Mugabane wa Afurika kugeza uyu munsi. Mu gukora uru rutonde, hagendewe ku rwego ibiciro bigezeho ku isoko ry'ivunjisha.

Dore ibihugu 10 bifite amafaranga afite agaciro gasumbye ayandi muri Afurika mu 2025:

1. Tunisian Dinar (TND) 

Amadinari ya Tunisia ni yo mafaranga afite agaciro gasumbye ayandi muri Afurika. Ifaranga rimwe ry’iki gihugu rivunjwa hafi 3.11 ku idolari rya Amerika, rikaba rikomeye bitewe n’imiyoborere ikomeye mu bijyanye n’ivunjisha no kugenzura ibyoherezwa n’ibitumizwa mu mahanga.

2. Libyan Dinar (LYD)

Libya ni kimwe mu bihugu bifite amafaranga akomeye kubera umutungo kamere w’amavuta yatumye ifaranga ryayo rigumana agaciro. Idinari rya Libya ivunjwa hafi 4.82 ku idolari.

3. Maroccan Dirham (MAD)

Ifaranga rya Maroc rifite agaciro kagera kuri 9.91 ku idolari . Maroc ifite ubukungu buteye imbere bushingiye ku bukerarugendo, ubuhinzi, ndetse n’inganda. Kuba iki gihugu gifitanye umubano ukomeye n’Umuryango w’Ubumwe bw’u Burayi nabyo byagize uruhare mu gutuma ifaranga ryacyo rigira agaciro gahamye.

4. Botswana Pula (BWP) 

Ifaranga rya Botswana riri ku rwego rwo hejuru mu mafaranga afite agaciro muri Afurika, aho rivunjwa 13.50 ku idolari. Botswana ifite ubukungu bukomeye kandi budahungabanywa n’impamvu nyinshi kubera imicungire myiza y’umutungo kamere n’ubuyobozi bwiza mu bijyanye n'ubukungu.

5. Seychellois Rupee (SCR) 

Seychelles, igihugu kigizwe n’ibirwa, gifite ifaranga rifite agaciro gakomeye kubera ubukungu bwacyo bushingiye ku bukerarugendo. Ifaranga rya Seychelles rivunjwa 13.64 ku idolari, bigashimangirwa n’ingamba za leta zo gukomeza gucunga ubukungu bw’iki gihugu gituriye inyanja y’Abahinde.

6. Ghanaian Cedi (GHS) 

Ifaranga rya Ghana rihura n’ihindagurika, ariko riguma mu mafaranga akomeye kuri uyu mugabane. Cedi ya Ghana ivunjwa agera kuri 14.25 ku idolari. Ghana ifite ubukungu bushingiye ku bucukuzi bw’amabuye y’agaciro, ubuhinzi, n’ubucuruzi mpuzamahanga.

7. Eritrean Nakfa (ERN) 

Ifaranga rya Eritrea rifite agaciro gahoraho kuko guverinoma igena igipimo cyo kurivunjisha, aho Nakfa 1 ingana na 15.00 ku idolari. Ibi bituma rigumana agaciro ariko nanone bikabuza isoko mpuzamahanga gukorera mu mucyo mu byerekeye ivunjisha.

8. South African Rand (ZAR) 

Rand ya Afurika y’Epfo ni rimwe mu mafaranga acuruzwa cyane muri Afurika. Rimwe ryayo rivunjwa agera kuri 18.13 ku idolari, ariko rikunze guhura n’ihindagurika bitewe n’izamuka ry’ibiciro ku masoko mpuzamahanga ndetse n’ibibazo by’imiyoborere y’iki gihugu.

9. Namibian Dollar (NAD)

Ifaranga rya Namibia rifitanye isano ya hafi n’irya Afurika y’Epfo. Namibia ni igihugu gifite ubukungu butajegajega bushingiye ku bucukuzi bw’amabuye y’agaciro n’ubuhinzi. Ifaranga ryayo rivunjwa 18.23 ku idolari.

10. Lesotho Loti (LSL) 

Ifaranga rya Lesotho riri mu cyiciro kimwe n’irya Namibia kuko na ryo rifitanye isano ya hafi n’ifaranga ryitwa 'Rand.' Loti ya Lesotho ivunjwa 18.23 ku idolari, aho ubukungu bw’iki gihugu bushingiye cyane ku bufatanye na Afurika y’Epfo mu bucuruzi no mu bukungu rusange.

Isomo ku bukungu bwa Afurika:

Abahanga mu by'ubukungu bemeza ko ibihugu bifite amafaranga afite agaciro gasumbye ayandi muri Afurika bikunze kugira imiyoborere myiza y’ubukungu, igenzura rikomeye ku ivunjisha, ndetse n’ubukungu butajegajega. Nubwo hari ibibazo byinshi bishingiye ku ifaranga ku mugabane wose, ibihugu bifite ubukungu burambye bikomeza kwihagararaho.

Uku kwihagararaho ni isomo rikomeye ku bihugu bihura n’ihungabana ry’ifaranga, aho bikwiye gushyira imbaraga mu gucunga neza ubukungu no kugabanya ihindagurika ry’ifaranga. 

Mu gihe Afurika igenda yinjira mu bukungu bwa digitali no kurushaho guhuza isoko ryayo, amafaranga yayo ashobora gukomeza kugira agaciro gahambaye mu bihe biri imbere.