Ahabanza Imikino

Tariki 5 Gashyantare; Umunsi w'amateka mu Isi y'umupira w'amaguru

Yanditswe na: Aloys Niyonyungu
Taliki:5/02/2025 8:51 0

Buri taliki 5 Gashyantare aba ari umunsi udasanzwe mu Isi y'umupira w'amaguru dore ko wavutseho abakinnyi badasanzwe banatanze ibyishimo ku bafana babo.

Kuri uyu wa Gatatu ni bwo Cristiano Ronaldo yavutse mu 1985 avukira mu byaro by'i Madeira muri Portugal. Ubu yujuje imyaka 40. Ni umwe mu bakinnyi beza babayeho mu mateka y'umupira w'amaguru bijyanye n'amakipe yakinnyemo, ibyo yafashije ikipe ye y'igihugu ndetse n'uburyo yahangayemo na mugenzi we Lionel Messi.

Cristiano Ronaldo kuri ubu ukinira Al Nassr yo muri Arabia Saudite, yatangiye gukina ruhago nk'uwabigize umwuga guhera muri 2002 ahereye mu ikipe ya Sporting CP y'iwabo muri Portugal, nyuma y'imyaka 2 yerekeje muri Manchester United ari naho yatangiye gukorera amateka.

Muri 2009 yahise yerekeza muri Real Madrid akomeza gukorerayo amateka, muri 2018 yahavuye yerekeza muri Juventus aza kuyivamo muri 2022 asubira muri Manchester United maze nyuma y'umwaka umwe ahava yerekeza muri Al Nassr arimo kugeza ubu.

Uyu mukinnyi yatangiye ikipe y'igihugu ya Portugal muri 2001 ahereye mu ikipe y'abatarengeje imyaka 15. Bimwe mu bikombe yatwaye kugeza ubu harimo 3 bya Premier League, 2 bya La liga, 2 bya Serie A ndetse na 5 bya UEFA Champions League.

Cristiano Ronaldo ufite ibihembo bya Ballon d'Or 5, kugeza ubu amaze gukina imikino 1262 akaba yaratsinzemo ibitego 923 ndetse ni we mukinnyi umaze gutsinda ibitego byinshi muri Champions League bigera kuri 140 mu mikino 181.

Umukinnyi wa 2 wavutse kuri uyu munsi ni umunya-Brazil, Neymar Jr wujuje imyaka 33. Atangira gukina umupira nk'uwabigize umwuga, hari muri 2009 ahereye mu ikipe y'iwabo ya Santos.

Nyuma y'imyaka 4 yaje kwerekeza mu ikipe ya FC Barcelona ndetse aba ari na ho yerekanira ubuhanga budasanzwe, gusa muri 2017 yerekeza muri Paris Saint-Germain.

Kugeza ubu akinira ikipe ya Santos nyuma y'uko ayisubiyemo mu kwezi kwa Mbere avuye muri Al Hilal yo muri Arabia Saudite ari yarerekejemo mu mpeshyi y'umwaka ushize.

Neymar ni umwe mu bakinnyi bagize impano idasanzwe bijyanye n'ubugeni yerekana mu kibuga acenga abantu mu buryo butangaje.

Bimwe mu bikombe yatwaye harimo 2 bya shampiyona ya Espagne, 5 bya shampiyona y'u Bufaransa ndetse na 1 cya UEFA Champions League ari muri FC Barcelona. Neymar muri rusange amaze gukina imikino 766 akaba yaratsinzemo ibitego 476.

Undi mukinnyi wavutse uyu munsi ni Carlos Tevez wujuje imyaka 41 wamaze gusezera kuri ruhago burundu ariko akaba yaranyuze mu makipe arimo Manchester City, Manchester United na Juventus.

Carlos Tevez washoboraga gukina nka rutahizamu mu kibuga hagati afasha ubusatirizi ndetse ananyura ku ruhande, kuri ubu ni umutoza w'ikipe yitwa Club Atlético Independiente y'iwabo muri Argentine.

Uyu mukinnyi wakiniye ikipe y'igihugu ya Argentine guhera muri 2001 kugeza muri 2015 yatsinze ibitego 268 mu mikino 719 yakinnye mu buzima bwe bwose bw'umupira w'amaguru.