Myugariro wa Man United yasubiye mu Buhorandi

Malacia w’imyaka 25 yari amaze amezi 17 adakina kubera imvune, ariko yagarutse mu kibuga mu Ugushyingo 2024. Uyu mukinnyi mpuzamahanga w’u Buholandi yageze muri Manchester United muri Nyakanga 2022, avuye muri Feyenoord aguzwe £13m ku masezerano y’imyaka ine.

Iyi ntizanyo ije nyuma y’uko Manchester United isinyishije Patrick Dorgu, umunya-Denmark wakinaga muri Lecce yo mu Butaliyani, ku masezerano y’imyaka itanu n’igice.

Malacia amaze gukina imikino umunani gusa muri uyu mwaka w’imikino kubera imvune y’ivi yagize, aho yaje kubagwa inshuro ebyiri mbere yo gusubira mu kibuga ku wa 28 Ugushyingo 2024.

Uyu myugariro yari umwe mu bakinnyi ba mbere baguzwe n’umutoza Erik ten Hag nyuma yo kugera muri Manchester United, akaba amaze gukina imikino 47 muri rusange yambaye umwenda w’iyi kipe ikinira kuri Old Trafford.

Hari ibiganiro byari byaratangiye kugira ngo Malacia atizwe muri Benfica yo muri Portugal, ariko byarangiye bidakunze.

Kuri ubu, PSV Eindhoven iri ku mwanya wa mbere muri shampiyona y’u Buholandi Eredivisie, aho irusha amanota abiri Ajax iri ku mwanya wa kabiri. PSV kandi izahura na Juventus mu mikino ya Champions League mu cyiciro cya knockout phase play-off.

Tyrell Malacia wakunze kwibasirwa n'imvune yatijwe mu Buhorandi muri PSV Eindhoven