Perezida Claudia yageze ku masezerano na Trump yo gusubika imisoro ku bicuruzwa bya Mexique

Ku wa Mbere, Perezida wa Mexique, Claudia Sheinbaum, yatangaje ko yageze ku masezerano na Perezida wa Leta Zunze Ubumwe za Amerika, Donald Trump, yo gusubika ishyirwaho ry'imisoro ihanitse ku bicuruzwa byinjira muri Amerika biva muri Mexique mu gihe cy’ukwezi kumwe.

Uyu mwanzuro wafashwe nyuma y’ibiganiro byihariye hagati y’aba bayobozi bombi, aho bemeranyije ko Mexique izohereza abasirikare 10,000 bo mu Ngabo z’Igihugu (National Guard) ku mupaka wayo na Amerika kugira ngo bakaze umutekano no kurwanya icuruzwa ry’ibiyobyabwenge bya fentanyl, kimwe n’abimukira binjira muri Amerika mu buryo bunyuranyije n’amategeko. 

Ku rundi ruhande, Amerika yiyemeje kongera ingamba zo guhagarika icuruzwa ry’imbunda zerekeza muri Mexique.

Perezida Trump yari yatangaje ko azashyiraho imisoro ya 25% ku bicuruzwa bituruka muri Mexique, avuga ko iki gihugu kitari gifata ingamba zihagije zo guhangana n’ibibazo by’abimukira n’icuruzwa ry’ibiyobyabwenge. Mexique na yo yari gutegura uburyo bwo kwihimura, harimo gushyiraho imisoro ku bicuruzwa bituruka muri Amerika.

Abasesenguzi mu by’ubukungu baburira ko iyi misoro yari kugira ingaruka zikomeye ku bucuruzi hagati y’ibi bihugu byombi, ikabangamira urujya n’uruza rw’ibicuruzwa muri Amerika ya Ruguru ndetse ikongera ibiciro ku masoko y’imbere mu bihugu byose birebwa n’aya masezerano.

Iyi nteguza y’ukwezi kumwe igamije guha umwanya impande zombi ngo zikomeze ibiganiro bigamije kugera ku masezerano arambye. Ni igihe cy’ingenzi ku nzego zombi kugira ngo harebwe niba Mexique izakomeza gushyira mu bikorwa ibyo yemeye, ndetse n’ukuntu Amerika izabyakira.

Mu gihe cy’ukwezi kumwe kw’igihe ntarengwa, impande zombi zizakomeza ibiganiro bigamije kugera ku masezerano arambye yo gukemura ibibazo by’umutekano ku mipaka no kunoza ubucuruzi hagati y’ibihugu byombi.

Src: New York Post

Umwanditsi: Kubwayo Jean de la Croix