Rutahizamu w'ikipe y'igihugu y'u Rwanda, Amavubi, Biramahire Abeddy n'Umunya-Cameroun, Assana Nah Innocent ukina anyuze mu mpande, basinyiye ikipe ya Rayon Sports amasezerano azarangizanya n'uyu mwaka w'imikino.
Iyi kipe niyo yabitangaje ibinyujije ku mbuga nkoranyambaga zayo mu mugoroba wo kuri uyu wa Gatanu tariki ya 31 Mutarama 2025.
Aba bakinnyi nibo ba mbere iyi kipe yambara Ubururu n'Umweru itangaje ko isinyishije ku Isoko ry'igura n'igurisha rw'abakinnyi ryo muri uku kwezi kwa Mbere rirafunga uyu munsi Saa sita z'ijoro.
Biramahire Abeddy asinyiye Rayon Sports nyuma y'uko atandukanye na Clube Ferroviário de Nampula yo muri Mozambique yari yaragiyemo mu mpeshyi y'umwaka ushize avuye muri UD Songo nayo yo muri iki gihugu.
Uyu rutahizamu w’ikipe y’Igihugu ‘Amavubi’ yakiniye andi makipe nka Police FC, Mukura VS na AS Kigali yo mu Rwanda, Buildcon yo muri Zambia, CS Sfaxien yo muri Tunisie na Al-Suwaiq Club yo muri Oman.
Umunya- Cameroon ,Assana Nah Innocent wakiniraga Coton Sport FC de Garoua y'iwabo nawe yasinye muri Rayon Sports nyuma yuko yari amaze igihe mu Rwanda.
Igihe yari muri Coton Sport FC, Assana Nah Innocent yakinanye na yo imikino ya CAF Champions League na CAF Confederation Cup.
Mu yandi makipe yakiniye harimo Moghreb Tétouan yo muri Maroc na Colombe Sport FC y’iwabo.
Rayon Sports yongeremo izi mbaraga nyuma y'uko yasoje imikino ibanza ya shampiyona iyoboye urutonde n'amanota 36 aho irusha APR FC amanota 5.
Biramahire Abeddy yasinyiye Rayon Sports
Assana Nah Innocent yasinyiye Rayon Sports
Eng
RSS 
TANGA IGITECYEREZO