Rurageretse hagati ya Jay-Z na Tony Buzbee

Intambara y’amategeko hagati ya Jay-Z na Tony Buzbee, umwunganizi w’abarega Sean Diddy Combs ibyaha by’ihohotera rishingiye ku gitsina, irarushaho gukara.

 Abanyamategeko ba Jay-Z bashinja Buzbee kwinjira mu rubanza atabanje guhura n’umukiriya we mbere yo gutanga ikirego, igikorwa bavuga ko kinyuranyije n’amategeko nk'uko tubikesha Hindustantimes.

Itsinda ry’abanyamategeko ba Jay-Z risaba ko Tony Buzbee afatirwa ibihano nyuma y’uko yemeye ko atigeze abonana na "Jane Doe", umukiriya w’ingenzi mu kirego, mbere yo kukijyana mu rukiko, nk’uko byatangajwe na TMZ.

Jay-Z na Sean Diddy Combs bavugwa mu kirego cy’ihohotera rishingiye ku gitsina cyakorewe umwana w’imyaka 13 mu birori bya MTV Video Music Awards byabereye i New York mu mwaka wa 2000. Nubwo Buzbee avuga ko yabanje kugenzura neza ibirego bya Jane Doe, itsinda rya Jay-Z risaba ko afatirwa ibihano kubera ko atigeze ahura n’umukiriya mbere yo gutanga ikirego.

Mbere y’uko ageza ikirego mu rukiko rwa New York, Tony Buzbee yatangaje ko umukiriya we Jane Doe yagizweho ingaruka zikomeye n’ihohoterwa, harimo no kunyweshwa ibiyobyabwenge. Nyuma y’ikiganiro kuri NBC, bivugwa ko hari ibitaragenze neza mu bisobanuro yatanze, ndetse yemera ko yakoze amakosa. Itsinda rya Jay-Z rimushinja kudakora iperereza ryimbitse ku byavuzwe n’umukiriya we mbere yo kubishyira mu itangazamakuru.

Nubwo Buzbee afite abakiriya benshi, bikaba bishoboka ko atabasha guhura n’umwe ku wundi, itsinda rya Jay-Z rivuga ko kuba atabonanye na Jane Doe mbere yo gutanga ikirego ari ikosa rikomeye.

Tony Buzbee udacana uwaka na Jay-Z

Nyuma y'uko Jay-Z na P-Diddy barashijwa gufata umwana w'imyaka 13 ku ngufu