CTC Gabiro yegukanye igikombe mu mikino ya RDF Interforce Competition -AMAFOTO

Aya marushanwa yatangiye ku wa 1 Ugushyingo 2024, ahuza amakipe atandukanye yo mu Ngabo z’u Rwanda (RDF). SOF yari yageze ku mukino wa nyuma isezereye Division 5 yo mu Burengerazuba ku ntsinzi ya 1-0, mu gihe CTC Gabiro yo yasezereye Republican Guard (RG) iyitsinze ibitego 5-1.

Umukino wa nyuma wabereye mu kibuga cya Kigali Pele Stadium, waranzwe no guhangana gukomeye hagati y’amakipe yombi. Igice cya mbere cyarangiye nta kipe ibashije kureba mu izamu, nubwo habayeho amahirwe atandukanye ariko abanyezamu barigaragaza.

Mu gice cya kabiri, ikipe ya SOF itozwa na Rugaju Reagan yagarutse ifite ingufu nyinshi, ndetse inashobora kubona igitego cyaje kwangwa n’abasifuzi bavuga ko habayeho kurarira. Nubwo SOF yakomeje gusatira, CTC Gabiro nayo yihagazeho, umukino urangira amakipe yombi anganya 0-0, bisaba ko hakitabazwa penaliti.

Muri penaliti, SOF yatsinze penaliti eshatu gusa mu nshuro eshanu bateye, mu gihe CTC Gabiro yinjije penaliti enye muri eshanu, biyihesha igikombe cy’iri rushanwa.

Uretse igikombe cya ruhago cyatwawe na CTC Gabiro, andi makipe yegukanye ibikombe mu mikino itandukanye harimo icya Netball cyatwawe na Rwanda Air Force, icya Handball gitwarwa na Rwanda Military Academy, icya Volleyball gitwarwa na Republican Guard (RG), Basketball cyatwawe na SOF Special Operations Force ikaba yanegukanye igikombe cyo Kumasha.

Iri rushanwa ryasojwe ku mugaragaro n’abayobozi bakuru b’Ingabo z’u Rwanda, bishimira uko amarushanwa yagenze n’uburyo abasirikare bagaragaje ubuhanga no gukomera ku ndangagaciro z’ubwitange n’imyitozo ihagije.

Abakinnyi babanje mu kibuiga ku ruhande rwa CTC Gabiro

Abakinnyi babanje mu kibuga ku ruhande rwa CTC Gabiro

Amafoto ya Mbere y'uko umukino utangira

Umukinnyi wa CTC Gabiro yaje kugira ikibazo gikomeye mu kibuga maze ajyanwa kwa muganga

 Amafoto yaranze umukino wa nyuma wahuje CTC Gabiro na Special Operations Force 

Abaturage ndetse n'abasirikare batandukanye bari bitabiriye umukino wa nyuma wahuje CTC Gabiro na Special Operations Force

Umunyamabanga wa Leta muri Minisiteri y'Ububanyi n'Amahanga n'Ubutwererane ushinzwe ubufatanye n'akarere, Gen(Rtd) James Kabarebe ari mu barebye uyu mukino

Abanyacyubahiro batandukanye mu gisirikare cya RDF bari bitabiriye umukino wa nyuma wa SOF na CTC Gabiro

Minisitiri w'Ingabo, Juvenal Marizamunda ageza ijambo ku baje kureba uyu mukino

Umugaba Mukuru w'Ingabo z'u Rwanda, Gen Mubarakh Muganga yashimiye abitabiriye amarushanwa n'imyitwarire yabaranze

Amafoto yaranze umuhango wo gutanga ibihenmbo

AMAFOTO- Ngabo Serge - Inyarwanda.com