REG BBC yasinyishije umukinnyi wo muri Senegal ufite 'ubuhanga buhambaye'

Umunya-Sénégal Jean Jacques Boissy wamenyekanye cyane muri Shampiyona y’u Burundi, yerekeje muri REG BBC mu rwego rwo gukomeza kwiyubaka mbere y’uko Shampiyona y’u Rwanda itangira mu mpera z’iki Cyumweru.

Nk’uko byemejwe na Perezida wa REG BBC, Ntwali Joseph, uyu mukinnyi yahawe amasezerano y’umwaka umwe.

Ntwali Joseph yagize ati: “Twamwongereye mu ikipe kuko dukeneye umukinnyi ukomeye mu bwugarizi kandi ubasha gukina neza nka Guard. Boissy afite ubuhanga buhambaye, kandi twizeye ko azadufasha kugera ku ntego zacu.”

Si ubwa mbere Jean Jacques Boissy agiye gukina mu Rwanda, kuko mu myaka ishize yanyuze muri Patriots BBC, nubwo bitakunze. Kuri iyi nshuro, agarutse afite izina rikomeye nyuma yo gutorwa nk’umukinnyi mwiza wa Shampiyona y’u Burundi mu mwaka ushize, ubwo yakinaga mu Urunani BBC.

Boissy ni umwe mu bakinnyi bamenyekanye muri Basketball Africa League (BAL), aho yageze ku mukino wa nyuma mu 2023 ari kumwe na AS Douanes yo muri Sénégal.

REG BBC irakina umukino wa mbere wa shampiyona na Orion BBC urabera muri Kepler College kuri uyu wa Gatanu, tariki ya 24 Mutarama 2025.

REG BBC yaguze umunya Senegal Jean Jaques Boissy