LeBron James mu nzira yo guca akandi gahigo

Ku myaka 40, LeBron James azaba ari umukinnyi wa mbere ukinnye NBA All-Star Game muri iki kigero cy’imyaka, akaba kandi inshuro ye ya 21 yitabiriye iri rushanwa rikomeye rikinwa n’abakinnyi b’intoranywa.

Uyu mwaka wa 2025 usanze LeBron James ari mu mwaka wa 22 akina muri NBA. Muri iyo myaka yose, usibye uwa mbere yinjiragamo, indi myaka yagiye ahamagarwa mu bakinnyi b’intoranywa, NBA All Stars.

Abasesenguzi bakomeye muri NBA, barimo Ernie Johnson, Shaquille O’Neal, Kenny Smith na Charles Barkley, batangaje ko umusaruro wa LeBron muri uyu mwaka w’imikino umushyira mu bagomba guhamagarwa mu bakinnyi bazabanza mu kibuga muri All-Star Game. 

Uyu musaruro urimo kwinjiza amanota 23.7 ku mukino, gukora ‘rebound’ 9, no gutanga indi mipira 7 yavuyemo amanota ku mikino 39 amaze gukina.

LeBron yafashije ikipe ya LA Lakers kugera ku mwanya wa gatanu mu gice cy’Uburengerazuba muri shampiyona, aho yagaragaje ubuhanga mu mukino batsinzemo Boston Celtics amanota 117-96 ku wa 24 Mutarama 2025.

Nubwo urutonde rw’abakinnyi b’intoranywa ruzatangazwa mu cyumweru gitaha, hari amahirwe ko LeBron ashobora kuzaba ari kumwe na mugenzi we bakinana Anthony Davis cyangwa abandi bakinnyi b’abahanga nka Stephen Curry, Shai Gilgeous-Alexander, Kevin Durant na Nikola Jokić.

Ku myaka 40, LeBron James arerekana ko ubushobozi bwo gukina ku rwego rwo hejuru n’umurava bidahuzwa n’imyaka. Niba byemezwa, iki gikorwa kizaba ikimenyetso cy’ubudasa bw’uyu mukinnyi mu mateka ya NBA.

LeBron James ashobora kuba umukinnyi wa mbere ukinnye NBA All Stars afite imyaka 40