Hatangijwe irushanwa rihuza amashami ya Polisi y'u Rwanda

Imikino y'umunsi wa mbere w'iri rushanwa muri uyu mwaka ryitabiriwe n'amakipe agera kuri 15, yabereye ku bibuga bitandukanye hirya no hino mu gihugu, aho mu mikino ine yabimburiye iyindi, amakipe ane yabashije kwegukana intsinzi n'amanota atatu, andi agataha amara masa.

Uko imikino y'umunsi wa mbere yagenze:

Sitade ya Muhanga: Southern Region 2-0 P/GHQs

Ku Ruyenzi/Kamonyi: TAFU 3-0 SAPU

Mu Ishuri rikuru rya Polisi: NPC 4-1 Northern Region

PTS Gishari: Eastern Region 2-1 CTTC Mayange.

Ubwo yatangizaga iri rushanwa mu ishuri rikuru rya Polisi (NPC) riherereye mu Karere ka Musanze; Commissioner of Police (CP) Rafiki Mujiji, uyobora iri shuri akaba yari anahagarariye ubuyobozi bwa Polisi muri uyu muhango, yasabye abitabiriye iri rushanwa kurangwa n'ubworoherane bazirikana inshingano bafite nk'abapolisi.

Yagize ati: "Mu izina rya Polisi mpagarariye muri kano kanya ndashimira abitabiriye iri rushanwa baba abakinnyi n'ababashyigikiye nsaba abakinnyi gukina umukino urimo urukundo n'ubworoherane muzirikana ko nyuma y'iyi mikino tugomba gukomeza kubahiriza inshingano dufite nka Polisi y'u Rwanda."

CP Mujiji yavuze ko intego y'iyi mikino ari uguhuza abapolisi bagasabana, bakiyumvanamo kandi bakanaganira by'umwihariko ntihabeho kwibanda gusa mu gutekereza akazi ahubwo ikabafasha kuruhuka mu mutwe no kwishimana n'abandi banyarwanda.

N'ubwo mu mikino yahuje amakipe umunani ku bibuga bitandukanye yagaragayemo kwinjiza mu izamu ibitego byinshi, ni imikino yaranzwe n'ishyaka ku mpande zombi kandi yari ibereye ijisho n'ubwo ababurana ari babiri, umwe aba yigiza nkana, yarangiye amakipe ya NPC, S. Region, TAFU na E. Region yegukanye intsinzi kugeza ubu akaba ariyo ayoboye amatsinda.

Andi makipe 7 yari yaruhutse akaba azakina ku munsi wa kabiri ariyo; Western Region, PTS&Band, AI, Central Region, TRS, SIF na Canine Brigade.

Imikino y'umunsi wa kabiri w'irushanwa izaba ku Cyumweru tariki ya 26 Mutarama, aho NPC izakina na W. Region, P/GHQs ihure na PTS&Band, CTTC Mayange ikine na C.Region naho TFU ikine na SIF.

Ni ku nshuro ya kabiri iri rushanwa rihuza amashami ya Polisi ribaye, iriheruka rikaba ryaregukanywe n'ikipe y'Ishuri rya Polisi ry'amahugurwa (PTS) rya Gishari isezereye Western Region Police Unit.