Amerika bizayorohera kwigarurira Greenland?

Tariki 7 Mutarama 2025, nibwo Trump yavuze ko Greenland ari ingenzi kuri Amerika ku mpamvu z’umutekano w’iki gihugu, avuga ko adateganya gukura ingabo za Amerika zimaze igihe muri Greenland kuko yazifashishwa mu kwegukana aho hantu cyangwa hagakoreshwa ubundi buryo nko kuhagura.

Nyuma yaho, umunyemari Elon Musk yagaragaje ko ashyigikiye gitekerezo cya Donald Trump, uherutse gutorerwa kongera kuyobora Leta Zunze Ubumwe za Amerika, cyo kwigarurira ikirwa cya Greenland gisanzwe kigenzurwa na Denmark.

Ni icyemezo Elon Musk yatangaje abinyujije ku rubuga nkoranyambaga X ku wa 12 Mutarama 2025.

Yaragize ati: “Ndizera ko abaturage ba Greenland bashaka kuba igice cya Amerika bakigenga, bahawe ikaze.”

Nubwo bimeze bityo ariko, ubuyobozi bw’iki kirwa butangaza ko kitazagurishwa Amerika. Ibi ni na byo byavuzwe na Guverinoma ya Danemark. Abandi badashyigikiye uyu mwanzuro, ni Leta y’u Bufaransa yatangaje ko EU itazemera ko igihugu icyo ari cyo cyose kivogera imbibi z’ibihugu biyigize.

Ni amagambo ya Minisitiri w’Ububanyi n’Amahanga w’u Bufaransa, Jean-Noël Barrot wagize ati: “Rwose nta gushidikanya, ntabwo EU izemerera ibindi bihugu byo ku Isi gutera imipaka yayo yemewe n’amategeko, icyo ari cyo cyose.”

Trump bwa mbere avuga kuri iyi ngingo hari mu 2019. Yongeye kuyigarukaho ku wa 7 Mutarama 2025, agaragaza ko yifuza ko icyo kirwa cyakwegukanwa na Amerika, ndetse avuga ko adateze gucyura ingabo za Amerika zimaze igihe muri Greenland.

Minisitiri w’Intebe wa Greenland, Mute Egede, yamaganye igitekerezo cyo kugurisha iki kirwa kuri Amerika, gusa yavuze ko biteguye kuganira na Trump, ndetse agaragaza ko bafite inyota yo kwigenga aho kugenzurwa na Amerika cyangwa Denmark.

Ubwo yari mu kiganiro n’itangazamakuru ku wa 8 Mutarama 2024, ari kumwe na Minisiriri wa Danemark, Mette Frederiksen, Minisitiri Mute Egede yabajijwe niba yaravuganye na Trump. Ati "Oya, ariko twiteguye kuganira”.

Abajijwe ku byo Trump yavuze byo kwanga gukura iwabo ingabo za Amerika mu buryo bwo kwigarurira icyo Kirwa, Minisitiri Egede yavuze ko Trump yari akomeje ariko “Greenland ari iy’Abanya-Greenland”, icyakora agaragaza ko ubufatanye mpuzamahanga ari ingenzi ndetse ko bazakomeza gukorana na Amerika mu bihe biri imbere.

Kugeza ubu, igice kinini cy’abaturage ba Greenland bashyigikiye icyemezo cya Donald Trump witegura kwinjira muri White House nka Perezida wa Leta Zunze Ubumwe za Amerika, cyo kugura icyo gihugu, kikongerwa kuri Amerika.

Ni ibikubiye mu ikusanyabitekerezo ryakozwe n’ikigo cya ’Patriot Polling’ rigaragaza ko abaturage 57,3% ba Greenland bashyigikiye icyemezo cya Trump wavuze ko yifuza kugura iki kirwa kubera impamvu z’umutekano.

Icyakora abandi bagera kuri 37,4% ntibashyigikiye iki cyemezo, mu gihe abandi 5,3% batarafata umwanzuro ku cyo bashyigikira.

Ni mu gihe abakoze iri kusanyabitekerezo bavuze ko "imibare yacu igaragaza ko abaturage benshi ba Greenland bifuza kwiyunga kuri Leta Zunze Ubumwe za Amerika."

Kugeza ubu, biracyagoye abahanga mu bukungu kugereranya igiciro byasaba Amerika kuba yakwigondera kwigarurira ikirwa cya Greenland, gusa uwitwa David Barker we yabwiye ikinyamakuru The New York Times ko bitewe n’ubutunzi buhambaye iki kirwa gifite bishobora kuyisaba byibuza tiriyari y’amadolari irenga.

Ikirwa cya Greenland gifite abaturage bagera ku bihumbi 60, gisanganywe ikigo cya gisirikare cya Amerika kandi gifite agaciro kanini mu rwego rwa gisirikare rwa NATO kubera umwanya wacyo w’ingenzi mu nzira z’ubwikorezi zinyura mu majyaruguru. Izi nzira zikomeje kuba nyabagendwa bitewe n’imihindagurikire y’ikirere.

Iki kirwa cyahoze kiyoborwa na Danemark kuva mu 1979, aho nyuma cyaje kubona ubwigenge binyuze mu matora ya kamarampaka mu 2009.

Abaturage ba Greenland kandi bafite inyota yo kwigenga burundu. Ubushakashatsi bwo mu 2019 bugaragaza ko 67.8% by’abaturage bifuza ko iki kirwa kiba igihugu cyigenga mu myaka 20 iri imbere.

Amerika yiyemeje kwigarurira ikirwa kinini ku Isi cya Greenland