FC Barcelona yanyagiye Real Madrid yegukana igikombe kiruta ibindi muri Espagne

Ni mu mukino wa nyuma wakinwe kuri iki Cyumweru Saa tatu z'ijoro kuri King Abdullah Sports City muri Arabia Saudite.

Umukino watangiye ikipe ya Real Madrid iri hejuru ndetse ku munota wa 5 gusa ihita ifungura amazamu ku mupira Vinicius Junior yari ahaye Kylian Mbappé arazamuka acenga Alejandro Balde awushyira mu nshundura.

Nyuma yuko ikipe ya FC Barcelona itsinzwe yahise itangira gusatira ishaka uko yakwishyura maze bigeze ku munota wa 22 Robert Lewandowski aha umupira Lamine Yamal azamuka yiruka acenga ba myugariro ba Real Madrid arekura ishoti riruhukira mu izamu.

Ku munota wa 36 FC Barcelona yaje kubona penariti ku ikosa Eduardo Camavinga yarakoreye Gavi ari mu rubuga rw'amahina. Yatewe na Robert Lewandowski ayishyira mu izamuka.

Nyuma yuko FC Barcelona ibonye igitego cya kabiri yakomeje gusatira bigeze ku munota wa 39 ibona icya 3 gitsinzwe na Raphinha ku mupira waruzamuwe na Jules Kounde.

Mbere yuko igice cya mbere kirangira Real Madrid yatsinzwe igitego cya 4 cya Alejandro Balde ku mupira yarahawe na Raphinha.

Igice cya kabiri cyaje Carlo Ancelotti utoza Real Madrid akora impinduka mu kibuga havamo Eduardo Camavinga hajyamo Dani Ceballos. Nyuma yo gukora impinduka mu kibuga iyi kipe yahise itsindwa igitego cya 5 cya Raphinha ku mupira yarahawe na Marc Casado.

Umunyezamu wa FC Barcelona,Wojciech Szczesny yaje kubona ikarita y'umutuku nyuma yuko yari ateze Kylian Mbappé wari ugiye kwinjira mu rubuga rw'amahina kandi ariwe mukinnyi wa nyuma w'iyi kipe ndetse hanatangwa kufura.

Iyi kufura yatewe na Rodrigo neza maze iruhukira mu izamu. Umukino wakomeje Real Madrid ishaka uko yakwishyura binyuze ku bakinnyi bayo nka Kylian Mbappé,Jude Bellingham na Rodrigo ariko birangira byanze itsinzwe na FC Barcelona ibitego 5-2.

Ikipe ya FC Barcelona yahise yegukana igikombe kiruta ibindi muri Espagne,kiba icya 15 yegukanye mu mateka yayo

FC Barcelona yatsinze Real Madrid iyitwara igikombe cya Super Cup