Abanyarwanda bategujwe imvura idasanzwe mu minsi mikuru y’impera z’umwaka

Ikigo cy’Igihugu gishinzwe Ubumenyi bw’Ikirere (Meteo Rwanda), cyatangaje ko muri iyi minsi isoza umwaka wa 2024, hateganyijwe imvura iri hejuru gato y’ikigero cy’imvura isanzwe igwa.

Meteo Rwanda yavuze ko hagati ya tariki 21-31 Ukuboza 2024, mu Rwanda hateganyijwe ingano y’imvura iri hagati ya milimetero 10 na 110.

Iri tangazo riragira riti: “Mu gice cya gatatu cy’ukwezi k’Ukuboza 2024 (kuva taliki ya 21 kugeza taliki ya 31), mu Rwanda hateganyijwe ingano y’imvura iri hagati ya milimetero 10 na 110. Imvura iteganyijwe iri hejuru gato y’ikigero cy’imvura isanzwe igwa muri iki gice”

Ryakomeje rivuga ko biteganyijwe ko imvura nyinshi izagwa mu gihe kiri hagati y'iminsi ine n'itandatu. Iyi mvura nyinshi iteganyijwe mu Turere twa Rusizi, Nyaruguru na Nyamagabe, ibice byinshi by'Uturere twa Gisagara, Huye, Nyamasheke, Karongi na Rutsiro, igice gito cy'uburengerazuba bw'Uturere twa Nyanza, Ruhango, Ngororero na Musanze n'amajyaruguru y'Uturere twa Rubavu na Nyabihu.

Imvura iri hagati ya milimetero 60 na 85 iteganyijwe mu Ntara y'Amajyaruguru, ukuyemo uburasirazuba bw'Akarere ka Gicumbi n' igice gito cy' amajyepfo y'Akarere ka Rulindo iteganyiwe kandi mu Karere ka Muhanga, ibice byo hagati by’Uturere twa Gisagara, Huye na Nyanza, igice kinini cy'Akarere ka Ruhango, uburengerazuba bw'Akarere ka Kamonyi, ahasigaye mu turere twa Nyamasheke, Karongi, Rutsiro, Ngororero, Rubavu na Nyabihu ndetse n'amajyaruguru y'Umujyi wa Kigali.

Ni mu gihe imvura iri hagati ya milimetero 35 na 60 iteganyijwe mu gice kinini cy'Uturere twa Bugesera, Gatsibo na Nyagatare, uburengerazuba bw'Akarere ka Rwamagana, no mu bice bisigaye by'Umujyi wa Kigali n'iby'Uturere twa Gisagara, Huye, Nyanza, Ruhango, Kamonyi, Rulindo na Gicumbi, ahasigaye mu Ntara y'lburasirazuba hakaba hateganyijwe imvura iri hagati ya milimetero 10 na 35.