Ishyirahamwe ry'abasifuzi bo mu gihugu cy'u Bwongereza, PGMOL, ryahagaritse burundu uwari umusifuzi David Coote nyuma yuko yagaragaye atuka ikipe ya Liverpool ndetse n'uwari umutoza wayo, Jurgen Klopp.
Mu kwezi kwashize ni bwo ku mbuga nkoranyambaga hacaracaye amashusho y'uyu musifuzi arimo avuga amagambo arimo n'ibitutsi kuri Jurgen Klopp.
David Coote yavuze ko uyu mugabo ari umwibone anavuga ko hari ubwo yigeze gusifurira Liverpool ikina na Burnley maze uyu mutoza agashaka kumuvugisha kuko yerekanaga ko yabasifuriye nabi ariko we akabyanga kuko atavugana n'umuntu wishyira hejuru.
Usibye ibi kandi uyu musifuzi yanagarutse ku ikipe ya Liverpool nabwo ayivugaho nabi yifashishije amagambo arimo ibitutsi.
Nyuma y'ibi ishyirahamwe ry'abasifuzi mu Bwongereza, PGMOL, ryahise ritangira gukora iperereza kuri aya mashusho ndetse riba rinahagaritse David Coote. Kuri uyu wa Mbere taliki ya 9 Ukuboza PGMOL yatangaje ko uyu musifuzi yamuhagaritse burundu.
Mu itangazo yashyize hanze yagize iti: "Nyuma yo gusoza iperereza ryimbitse ku myitwarire ya David Coote, akazi ke na PGMOL karahagaritswe uyu munsi ndetse bihita bitangira gukurikizwa.
Ibikorwa bya David Coote byagaragaye ko binyuranyije cyane n’amasezerano y’akazi. Gushyigikira David Coote bikomeje kutubera ingenzi kandi dukomeje gushishikazwa n'imibereho ye. David Coote afite uburenganzira bwo kujuririra icyemezo cyo guhagarika akazi ke."
Uyu musifuzi yatangiye gusifura muri shampiyona y'icyiciro cya mbere mu Bwongereza mu mwaka w'imikino wa 2018/19. Kuva uyu mwaka w'imikino watangira muri Premier League, yari amaze gusifura imikino 6 irimo uheruka Liverpool yatsinzemo Aston Villa ku wa Gatandatu w'icyumweru gishize.
David Coote wahagaritswe mu mwuga wo gusifura burundu
Eng
RSS 
TANGA IGITECYEREZO