Iradukunda Elie Tatou yerekeje muri Portugal mu igeragezwa mu ikipe yo mu Cyiciro cya mbere

Iradukunda Elie Tatou, umukinnyi w’umunyarwanda ukina aca ku ruhande rw’iburyo muri Mukura VS, kuri iki Cyumweru yerekeje muri Portugal aho agiye gukora igeragezwa mu ikipe ya Sporting Club Braga, imwe mu makipe yo mu cyiciro cya mbere muri iki gihugu. Ni amahirwe akomeye ku musore w’imyaka 18, kuko aramutse anyuze iyi kipe, yahita isinyishwa.

Amakuru yizewe yemeza ko Iradukunda Elie yatangiye urugendo rwe ku Cyumweru nijoro, saa mbiri, agana muri Sporting Club Braga, aho azamara iminsi itanu mu igeragezwa. Nyuma y’icyo gihe, bizaterwa n’uko azitwara mu kibuga.

Nubwo Sporting Club Braga, kuri ubu iri ku mwanya wa gatanu muri shampiyona ya Portugal 2024-2025, ari yo ikurikirana uyu mukinnyi, hari amahirwe y’uko mu gihe atabashije kwemeza iyi kipe, azakomeza igeragezwa mu ikipe ya Vizela yo mu cyiciro cya kabiri.

Vizela iri ku mwanya wa 12 n’amanota 13 muri shampiyona y’icyo cyiciro.

Byatangajwe ko Iradukunda afite amasezerano ari kumwe na Mukura VS azarangira mu mpeshyi ya 2025.

Uyu musore kandi amaze amezi asaga atatu abonye Visa imwemerera kwinjira muri Portugal, gusa habanje gukorwa ibintu bitandukanye byo gushyira ku murongo kugira ngo urugendo rw’imikoranire rubeho neza.

Mu bihe bitandukanye, Iradukunda Elie yagiye ahamagarwa mu makipe y’u Rwanda, yaba mu batarengeje imyaka 23 aho yagaragaje impano idasanzwe mu kibuga.

Iradukunda Elie Tatou yagiye mu igerageza muri Portugal