Rwanda Premier League: Musanze FC yirengagije amarira ya Kiyovu Sports

Kiyovu Sports yari yakiriye Musanze FC mu mukino w’umunsi wa 12 wa shampiyona y’u Rwanda, Rwanda Premier League 2024-25.

Ni umukino amakipe yombi yamanutse ashaka gutsinda, kuko mbere y’umukino Kiyovu Sports yari ifite amanota atandatu iri ku mwanya wa nyuma, Musanze FC yo mbere y’umukino yari ku mwanya wa 13 n’amanota Icyenda.

Ni umukino watangiye Musanze FC yataka izamu rya Kiyovu Sports. Uburyo bwageragejwe n’abakinnyi nka Adeaga Johanson, Sulley Mohammed na Ntjyinama Patrick amahirwe yagumye kuba make ku ikipe ya Musanze FC, kuko ubwo buryo bwakuwemo n’umuzamu wa Kiyovu Sports Ishimwe Patrick.

Ikipe ya Kiyovu Sports nayo yagumye kugerageza uburyo butandukanye mu gice cya mbere, kuko Karim Machenzi yagumye kugerageza uburyo bwinshi imbere y’izamu rya Musanze FC, gusa ba rutahizamu ba Kiyovu Sports bananirwa gutsinda igitego mu izamu rya Musanze FC ryari ririnzwe na Nsabimana Jean De Dieu. Igice cya mbere cyarinze kirangira nta kipe irabona igitego kuko cyarangiye ari ubusa ku busa.

Igice cya kabiri nacyo cyagarutse amakipe yombi afite gahunda yo kwatakana imbaraga zidasanzwe, kuko abazamu ku mpande zombi, bagumye kuba maso kuko buri muzamu yakuyemo uburyo bukomeye butatu mu gice cya kabiri.

Ku munota wa 85 Musanze FC yazamutse ari simusiga imbere y’izamu rya Kiyovu Sports maze Nkurunziza Felicien arekura ishoti rikomeye ryabyaye igitego cya mbere cya Musanze FC. Kiyovu ikimara kurya igitego yagumye kwatakana imbaraga zidasanzwe, maze ku munota wa 90, umunya Senegal Shelf Bayo arata igitego cyari kugarura mu mukino Kiyovu Sports.

Umukino warangiye Musanze FC ifite igitego kimwe ku busa bwa Kiyovu Sports maze  iyi kipe yo ku Mumena iguma ku mwanya wa nyuma n'amanota arindwi, Musanze FC yo ifata umwanya wa 11 n'amanota 12. 

Mu yindi mikino yakinwe muri shampiyona y'u Rwanda, Marines FC yanganyije na Rutsiro FC igitego kimwe kuri kimwe, maze Rutsiro ijya ku mwanya wa 10 n'amanota 14, Marines yo ijya ku mwanya wa Munani n'amanota 16.Musanze FC yatsinze Kiyovu Sports igitego kimwe ku busa

Kiyovu Sports ikomeje kuguma mu myanya mibi nyuma yo gutsindwa na Musanze FC

Marines FC yaguye miswi na Rutsiro igitego kimwe kuri kimwe