Indwara isa n'ibicurane imaze guhitana abasaga 79 muri DRC

Nk’uko byatangajwe na BBC, Minisiteri y’ubuzima muri DRC ivuga ko abasaga 79 bapfuye bazize indwara itazwi ifite ibimenyetso bisa n’ibicurane mu Majyepfo y’iburengerazuba bwa Repubulika Iharanira Demokarasi ya Kongo. 

Minisiteri y’ubuzima ivuga ko abantu benshi bapfuye bari hagati y’imyaka 15 na 18, abantu barenga 300 banduye bagaragaza ibimenyetso nk'umuriro, kubabara umutwe, ibicurane no gukorora, ingorane zo guhumeka no kubura amaraso.

Umuyobozi w’umuryango wita ku buzima (OMS) mu karere ka Afurika, yabwiye BBC ko "bohereje itsinda mu karere ka kure kugira ngo bakusanye ingero z’iperereza rya laboratoire".

Umudepite waho yatangarije Radio Top Congo ko abantu bagera kuri 67 bapfuye, anasaba ubufasha. Depite yagize ati: "Turabibutsa ko ibitaro bya Panzi bidafite imiti yo guhangana n'iki cyorezo. Dukeneye ubufasha rwose."

Ubuyobozi bwasabye abaturage gukomeza gutuza no kuba maso. Bwasabye gufata ingamba zo gukaraba intoki bakoresheje isabune n’amazi meza, bakirinda guteranira hamwe, kandi bakirinda gukora ku mibiri y’abapfuye.

Leta ya DRC irashishikariza abaturage bayo kwimakaza umuco wo gukaraba intoki n'amazi meza n'isabune buri gihe

Umwanditsi: KUBWIMANA Solange.