NBA: Jaylen Brown yagaruye Boston Celtics ku ntebe yo gutsinda, LA Lakers yongera gutsindwa

Mu gitondo cyo kuri uyu wa Kabiri Boston Celtics iyobowe na Jaylen Brown, yatsinze Miami Heat mu gihe Minnesota Timberwolves yihanangirije Los Angeles Lakers, ikomeza kugaragaza ko ari ikipe ikomeye muri uyu mwaka w’imikino.

Nyuma yo gusiba umukino Boston Celtics yari yatsinzwemo na Cleveland kubera uburwayi, Jaylen Brown yagarutse mu kibuga maze atsinda amanota 29, afasha ikipe ye gutsinda Miami Heat amanota 108 kuri 89.

Boston Celtics yagaragaje ko ifite imbaraga zikomeye icyesha gutsinda imipira myinshi, itsinda amanota atatu (three-pointers), aho yatsinze imipira 19 kuri 55 yagerageje, mu gihe Miami Heat yagerageje 35, igatsinda 8 gusa.

Payton Pritchard ukina avuye ku ntebe y’abasimbura yatsinze amanota 25, mu gihe Derrick White yatsinze amanota 19.

Jayson Tatum yatsinze amanota 18, maze Boston Celtics ikomeza kuguma ku mwanya wa kabiri mu Burasirazuba. Ku ruhande rwa Miami, Tyler Herro na Jaime Jaquez Jr. ni bo bitwaye neza batsinda amanota 19 buri umwe.

Mu mujyi wa Minneapolis, ikipe ya Minessota Timberwolves yatsinze Los Angeles Lakers amanota 109 kuri 80, mu mukino wagaragayemo intege nke za Lakers mu kwitwara neza mu kwataka.

Julius Randle yafashije Timberwolves gutsinda amanota 18, mu gihe Rudy Gobert yatsinze amanota 17 anakora rebounds 12.

Ku ruhande rwa Los Angeles Lakers, D’Angelo Russell ni we watsinze amanota menshi 20, mu gihe Anthony Davis yatsinze 12 naho LeBron James agatsinda 10 gusa, ahusha imipira 12 muri 16 yagerageje. 

Ikipe ya Lakers ikomeje kugaragaza ibibazo bikomeye muri uyu mwaka, aho bakomeje gutsindwa mu buryo butari butakekwaga ku ikipe iri mu zikunzwe cyane muri NBA.

Mu yindi mikino, Atlanta Hawks yatsinze New Orleans Pelicans amanota 124 kuri 112, ikomeza gutsinda umukino wa kane wikurikiranya. 

De’Andre Hunter yafashije Atalanta Hawks atsinda amanota 22, mu gihe New Olireans Pelicans ikomeje kugorwa no gusohoka mu bihe bibi Ikomeje gutakaza imikino icyenda yikurikiranya.

Mu mujyi wa Chicago, Chicago Bulls yatsinze Brooklyn Nets amanota 128 kuri 102. Nikola Vucevic yatsinze amanota 21, naho Josh Giddey yigaragaza atsinda amanota 20, akora rebounds 13, anatanga imipira 11 yahesheje amanota bagenzi be.

Jaylen Brown yafashije Boston Celitice gutsinda Miami Heat

Los Angeles Lakers yananiwe kwikura mu biganza bya Minessota Timber Wolves

Atalanta Hawks yatsinze New Olireans Pelicans

Chichago Bulls yihanangirije Brooykin Nets