Umuherwe Bill Gates ushyigikiye ko Kamala Harris yaba Perezida wa Leta Zunze Ubumwe z'Amerika, yamuteye inkunga ya Miliyoni 50 z'amadolari zimufasha mu bikorwa byo kwiyamamaza.
Kuva aho Visi Perezida Kamala Harris yatangiye kwiyamamariza ku mwanya wa Perezida ahagarariye ishyaka ry'Abademokarate, yagiye ashyigikirwa n'ibikomerezwa bitandukanye kuva ku banyapolitiki, abahanzi kugeza no mu baherwe.
Mu berekanye ko bari inyuma ya Kamala Harris mu minsi ya mbere harimo umuherwe Bill Gates. The New York Times yatangaje ko uyu mugabo yamaze guha inkunga Kamala Harris ingana na Miliyoni 50 z'Amadolari azamufasha mu bikorwa byo kwiyamamaza.
Bill Gates umukire wa Gatandatu ku Isi ufite Biliyoni 105.6 z'Amadolari, yahaye iyi nkunga Kamala Harris abinyujije mu mushinga we yise 'Future Forward USA Action' ugamije kuzana impinduka muri Amerika.
Ibi bimenyekanye nyua yaho muri Nzeri uwahoze ari umugore we Melinda Gates yateye inkunga Kamala Harris ya Miliyoni 52 z'Amadolari. Bivuze ko bombi bamaze kumuha inkunga ya Miliyoni 102 z'Amadolari.
Mu ntangiriro z'uku kwezi ibiro bishinzwe kwamamaza Kamala Harris byemeje ko amaze kwakira inkunga ya Miliyari 1 y'Amadolari, mu gihe Donald Trump bahanganye amaze guhabwa Miliyoni 430 z'Amadolari ndetse nawe umuherwe Elon Musk yamuhaye inkunga ya Miliyoni 75 z'Amadolari.
Umuherwe Bill Gates yahaye Kamala Harris inkunga ya Miliyoni 50 z'Amadolari
Eng
RSS 
TANGA IGITECYEREZO