APR FC yageze mu Misiri amahoro aho igiye gukina na Pyramids FC - AMAFOTO

Kuwa Mbere ni bwo iyi kipe y'Ingabo z'igihugu yahagurutse mu Rwanda ku kibuga cy'indege i Kanombe, inyura i Addis Ababa n'i Dubai none mu gitondo cyo kuri uyu wa Gatatu yageze i Cairo mu Misiri amahoro. APR izakinira na Pyramids FC ku wa Gatandatu w'iki cyumweru saa Mbili z'ijoro mu mukino wo kwishyura w'ijonjora rya Kabiri ukanabanziriza amatsinda ya CAF Champions League.

Umukino ubanza wari wabaye kuwa Gatandatu w'icyumweru gishize muri Stade Amahoro ukaba wari warangiye amakipe yombi anganya igitego 1-1. Igitego cya APR FC cyatsinzwe na Mohamed Chibi witsinze ku mupira wahinduwe na Mamadou Lamine Bah mu gihe icya Pyramids FC cyo cyatsinzwe na Fiston Kalala Mayele.

APR FC ni ubwa kabiri yerekeje mu Misiri igiye gukina na Pyramids FC muri iki cyiciro nyuma y'uko mu mwaka ushize yari yagiyeyo ariko birangira bitagenze neza kuko yayinyagiye ibitego 6-1 ndetse ihita inayisezerera. Kugira ngo ikipe y'Ingabo z'igihugu ikomeze igere mu matsinda kuri iyi nshuro irasabwa nibura gutsinda cyangwa bakaba banganya hejuru y'ibitego 2.

Ubwo abakinnyi ba APR FC bari bageze mu Misiri