APR FC yerekeje mu Misiri

Iyi kipe y'Ingabo z'igihugu yahagurutse mu Rwanda ku kibuga cy'indege i Kanombe kuri uyu wa Kabiri tariki 17 Nzeri 2024 Saa Cyenda z'amanywa.

Iyi kipe iranyura i Addis Ababa n'i Dubai mbere yo kugera i Cairo mu Misiri aho izakinira na Pyramids FC ku wa Gatandatu w'iki Cyumweru Saa Mbiri z'ijoro mu mukino wo kwishyura w'ijonjora rya Kabiri ukanabanziriza amatsinda ya CAF Champions League.

Umukino ubanza wari wabaye ku wa Gatandatu w'icyumweru gishize muri Stade Amahoro ukaba wari warangiye amakipe yombi anganya igitego 1-1. Igitego cya APR FC cyari cyatsinzwe na Mohamed Chibi witsinze ku mupira wari uhinduwe na Mamadou Lamine Bah mu gihe icya Pyramids FC cyo cyatsinzwe na Fiston Kalala Mayele.

APR FC ni ubwa kabiri yerekeje mu Misiri igiye gukina na Pyramids FC muri iki cyiciro nyuma y'uko mu mwaka ushize yari yagiyeyo ariko birangira bitagenze neza kuko yayinyagiye ibitego 6-1 ndetse ihita inayisezerera.

Kugira ngo ikipe y'Ingabo z'igihugu ikomeze igere mu matsinda kuri iyi nshuro irasabwa nibura gutsinda bakaba banganya hejuru y'ibitego 2.

Abakinnyi b'ikipe ya APR FC bari ku kibuga cy'indege i Kanombe mbere yo kwerekeza mu Misiri