Igitego cya Jojea Kwizera gihataniye Igihembo muri Leta Zunze Ubumwe za Amerika

Ni igitego yatsinze kuwa Kane w'icyumweru gishize ubwo ikipe ye ya Rhode Island FC yatsindaga El Paso Locomotive FC ibitego 3-0 mu mukino wa shampiyona.

Uyu mukino ugeze ku munota 27, Jojea Kwizera yafashe umupira ahera mu kibuga hagati acenga aragenda yinjira mu rubuga rw'amahina, yegera izamu acisha umupira mu maguru ya ba myugariro uragenda unyeganyeza inshundura.

Iki gitego kiryoheye ijisho gihataniye iki gihembo cy'igitego cy'Icyumweru muri Leta Zunze Ubumwe z'Amerika n'ibindi bitego 3 byatsinzwe n'abandi bakinnyi. Gutora kimwe muri byo bikorwa, bikorerwa ku rubuga rwa shampiyona y'icyiciro cya kabiri muru Leta Zunze Ubumwe za Amerika (usl championship.com).

Jojea Kwizera akomeje kwitwara neza muri Rhode Island FC dore ko mu mikino 2 iheruka afitemo ibitego 2 ndetse akaba yaratanze umupira umwe wavuyemo igitego. Ibi byafashije iyi kipe ye kuba iri ku mwanya wa 9 mu gice barimo cy'Uburasirazuba.

Uyu mukinnyi kandi aheruka guhamagarwa mu Amavubi bwa mbere ndetse ahita anayifasha gutsinda Lesotho mu gushaka itike y'igikombe cy'Isi cya 2026.

Jojea Kwizera ukomeje kwitwara neza mu ikipe ye ya Rhode Island FC