Abenshi ntibakinishijwe! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri Kenya,ku munsi w'ejo ku Cyumweru ikipe ya Gormahia FC ikinamo Sibomana Patrick na Emery Bayisenge yatsindaga AFC Leopards ikinamo Gitego Arthur gusa muri aba bakinnyi bose b'Abanyarwanda nta n'umwe wabanje mu kibuga.

Ku ruhande rwa Gormahia FC Sibomana Patrick yinjiyemo asimbuye ku munota wa 70 mu gihe Emery Bayisenge we atarari ku ntebe y'abasimbura ndetse no kuri AFC Leopards naho ntabwo Gitego Arthur yari no ku ntebe y'abasimbura.

Biteganyijwe ko ikipe ya Gormahia FC iri ku mwanya wa 1 ku rutonde rwa shampiyona izasubira mu kibuga kuwa Gatandatu ikina na Murang'a SEAL naho AFC Leopards iri ku mwanya wa 8 isubire mu kibuga ikina na Combel ku Cyumweru muri shampiyona.

Muri Tanzania ku wa Kane w'icyumweru gishize ikipe ya Namungo FC ikinamo Kagere Meddie yatsindaga Coastal Union igitego 1-0 muri shampiyona.

Muri uyu mukino ntabwo uyu rutahizamu w'Umunyarwanda yabanje mu kibuga gusa yinjiyemo asimbuye ku munota wa 69.

Namungo FC iri ku mwanya wa 8 ikaba iri bwongere gukina uyu munsi ku wa Mbere icakirana na Simba SC.

Muri Libya ,ku wa Gatandatu Al Ahly Tripoli ikinamo Manzi Thierry yatsindwaga n'ikipe ya Al Madina igitego 1-0. 

Inkuru itari nziza ni uko uyu mukinnyi w'Umunyarwanda atigeze akandagira mu kibuga ndetse akaba atari ari no ku ntebe y'abasimbura.

Nubwo ikipe ya Al Ahly Tripoli yatsinzwe ariko iracyari  ku mwanya wa mbere ku rutonde rwa shampiyona.

Tukiri muri Libya mu ikipe ya Al Ta'awon SC yo ikinamo Haruna Niyonzima, ku munsi w'ejo ku Cyumweru yanganyaga n'iyitwa Al Akhadar igitego 1-1.

Uyu mukinnyi w'Umunyarwanda yabanje mu kibuga aza kuvamo asimbuwe ku munota wa 46. Ikipe ya Al Ahly Tripoli iri ku mwanya wa 4 ku rutonde rwa shampiyona.

Muri Morocco,mu ikipe ya AS Far Rabat ikinamo Imanishimwe Emmanuel Manguende ku munsi w'ejo ku Cyumweru yatsindaga ikipe ya Mas Fes ibitego 3-1.

Uyu myugariro w'Amavubi ntabwo yigeze akandagira mu kibuga gusa yari ku ntebe y'abasimbura. Ikipe ya AS Far Rabat kuri ubu iri ku mwanya wa mbere ku rutonde rwa shampiyona, izasubira mu kibuga ikina na Husa ku wa Gatanu w'iki Cyumweru.

Muri Afurika y'Epfo,mu ikipe ya TS Galaxy ikinamo Ntwari Fiacre ku munsi w'ejo ku Cyumweru yatsindwaga na Stellenbosch ibitego 2-1. 

Uyu munyezamu w'Amavubi niwe waruri mu kibuga nk'uko bisanzwe. TS Galaxy kuri ubu iri ku mwanya wa 6, ikaba izagaruka mu kibuga ku wa Gatanu ikina na Swallows.

Muri Ukraine mu ikipe ya Kryvbas Kryvyi Rih ikinamo Bizimana Djihad ku wa Gatandatu yatsindaga FC Chornomorets Odesa ibitego 2-1. 

Uyu Kapiteni w'ikipe y'igihugu y'u Rwanda, Amavubi yari yabanje mu kibuga nk'ibisanzwe ndetse yewe yarangije n'umukino. 

Kryvbas Kryvyi Rih iri ku mwanya wa 3, izasubira mu kibuga ikina na FC Metalist 1925 Kharkiv ku Cyumweru muri shampiyona.

Mu Bubiligi mu ikipe ya Standard de Liege ikinamo Hakim Sahabo,ku wa Gatandatu yanganyaga na Westerlo ibitego 3-3. Uyu mukinnyi w'Umunyarwanda yabanje mu kibuga aza gusimbuzwa ku munota 64.

Biteganyijwe ko Standard de Liege izasubira mu kibuga ku munsi w'ejo ikina na KV Mechelen.

Muri shampiyona y'icyiciro cya Kabiri muri Sweden,mu ikipe ya Sandkvens IF ikinamo Byiringiro League na Mukunzi Yannick ku wa Gatandatu yatsindaga Oster igitego 1-0. 

Muri aba bakinnyi b'Abanyarwanda nta n'umwe wabanje mu kibuga gusa Mukunzi Yannick yinjiyemo asimbuye  ku munota wa 86 mu gihe Byiringiro League we atari no ku ntebe y'abasimbura.

Sandkvens IF iri ku mwanya wa 8 n'amanota 6 ku rutonde rwa shampiyona, ikazasubira mu kibuga ku wa Gatandatu ikina na Gefle IF.

Tukiri muri shampiyona y'icyiciro cya Kabiri muri Sweden mu ikipe ya Gefle IF ikinamo Rafael York,ku munsi w'ejo yatsindwaga na Oddevold ibitego 2-1.

Ntabwo uyu mukinnyi w'Amavubi yigeze akandagira mu kibuga nta n'ubwo yari ku ntebe y'abasimbura. Gefle IF iri ku mwanya wa 14 kugeza ubu, ikazasubira mu kibuga ikina na Sandkvens IF ku wa Gatandatu.

Muri shampiyona y'icyiciro cya Kabiri mu Buholandi mu ikipe ya FC Groningen ikinamo Noam Merani ku wa Gatandatu yatsindaga Cambuur ibitego 3-0.

Ntabwo uyu mukinnyi ufite inkomoko mu Rwanda, ntabwo yakinnye gusa yari ku ntebe y'abasimbura. Biteganyijwe ko FC Groningen iri ku mwanya wa 3 kugeza ubu izasubira mu kibuga ikina na Willem ll ku wa Gatanu.

Muri Macedonia mu ikipe ya FC Shkupi ikinamo Rwatubyaye Abdul ku munsi w'ejo ku Cyumweru yanganyaga na Sileks 0-0.

Nk'ibisanzwe uyu myugariro w'Amavubi yari yabanje mu kibuga ndetse arangiza n'umukino adasimbujwe. FC Shkupi kuri ubu iri ku mwanya wa 2, ikazasubira mu kibuga ku Cyumweru ikina na Tikvesh.