Paul Pogba mu nzira zo gusezera burundu ku mupira w'amaguru

Tariki 20 Kanama 2023, ni bwo ikipe ya Juventus yakinaga umukino wa mbere wa Shampiyona n'ikipe ya Udinese ndetse inawutsindamo ibitego 3-0. 

Nubwo kuri uyu mukino Paul Pogba atari yabanje mu kibuga, inzego zishinzwe gupima abakinnyi zamukoreye izusuma ngo barebe niba adakoresha imiti yongera ingufu.

Nyuma yo gukorerwa isuzuma, mu mubiri wa Paul Pogba basanzemo ibinyabutabire bya 'Testosterone' biri hejuru kandi iki kinyabutabire kitemewe mu bakinnyi b'umupira w'amaguru. 

Ikipe ya Juventus nyuma y'ibyo yongeye gusaba ko yakongera gukorerwa irindi suzuma nanone ibisubizo byongera kugaragaza ko mu mubiri we harimo imisemburo ya testosterone iri hejuru, ibintu bigaragaza ko yaba yarakoresheje imiti yongera imbaraga.

Kuwa Kane w'iki cyumweru ni bwo amakuru yagiye hanze avuga ko abashinjacyaha bo mu Butaliyani bamaze gusabira Paul Pogba w'imyaka 30 guhanishwa imyaka 4 adakandagira mu kibuga.

Ubwo bivuze ko yazasubira mu kibuga afite imyaka 34, gusa ikinyamakuru The Sun kirandika ko uyu mukinnyi ukomoka mu Bufaransa ashobora guhita afata umwanzuro wo kureka ruhago burundu.

Paul Pogba ni umwe mu bakinnyi bakina mu kibuga hagati bagaragaje ubuhanga budasanzwe bijyanye n'imipira atanga kuri ba rutahizamu. Yakiniye Manchester United na Juventus gusa ndetse n'ikipe y'igihugu y'u Bufaransa anatwarana nayo igikombe cy'Isi cya 2018.

Paul Pogba yakiniye Manchester United na Juventus gusa

Paul Pogba nahanishwa kumara imyaka 4 adakina bishobora gutuma areka ruhago burundu