Migambi, umuhungu wa Mukeshabatware yavuze imyato umukobwa bagiye gukora ubukwe

Mu ijoro ryo kuri uyu wa Mbere tariki 26 Kamena 2023, nibwo Migambi yatangaje ko agiye gukora ubukwe n’uyu mukobwa bamaze igihe mu rukundo.

Yavuze ko ‘nejejwe no kubatangariza inkuru nziza y’ubukwe bwanjye’. Akomeza ati “Ndabatumiye uwiteza azabashoboze twizihizanye ibi byiza.”

Mu kiganiro na InyaRwanda, Migambi yavuze ko imyaka ibiri ishize ari mu rukundo n’uyu mukobwa, usobanuye byinshi mu rugendo rw’ubuzima bwe.

Yavuze ko yamenyanye nawe nyuma y’urupfu rw’umubyeyi we Mukeshabatware Dismas.

Ati “Uyu mukunzi asobanuye byose mu buzima bwanjye. Twamenyanye ndi mu bihe bibi kandi by’agahinda nyuma y’urupfu rwa Papa (Mukeshabatware Dismas) ambera ihumure, amba hafi muri uwo mubabaro, amenya kumpoza no kunturisha, ambera umujyanama mwiza, ikiruta byose amfasha mu bihe byo gusenga n’isanamutima.”

Migambi avuga ko muri icyo gihe yahise amenya ko uyu mukobwa atari umuntu usanzwe waje mu buzima bwe.

Akomeza ati “Nibwo nahise menya ko atari umukobwa usanzwe ahubwo ari nk’umu Malayika kuri njye Imana yanyohereje bityo sinazuyuza gusingira uwo mucyo w’ubuzima bwanjye.”

Migambi avuga ko Cynthina bagiye kurushinga yamwigiyeho byinshi, kandi afite indangagaciro zatumye amwiyegereza.

Ati “Ni umunyampuhwe nyinshi kandi yuje urukundo no guca bugufi, akunda gusenga kandi ni umunyamahoro, byumwihariko arinda umutima wanjye intimba mbese ni nk’ingabo inkingira”

Migambi yabwiye InyaRwanda ko umunsi abwirwa Yego n’uyu mukobwa wabaye uw’urwibutso, kuko yabonaga bisa nk’inzozi za ku mwanya.

Uyu musore asobanura ko inkuru y’abo y’urugendo rw’urukundo ari ngari, ku buryo atabona uko abihina.

Akomeza ati “Ariko icyo nibuka ni uko atari umuntu wahise wemera ko dukundana rugikubita ahubwo yabanje gushima ko tumenyana byimbitse ngo biduhe amahitamo adahubutse.”

“Rero anyemerera urukundo ubwabyo nirwo rwibutso rukomeye kuruta izindi menya ariyo nkuru nziza nagize mu buzima nubwo ntarazitondeka ku murongo ngo menye iri kwisonga.”

Uyu musore aherutse gushyira hanze album yise ‘Inyanja’ yateguye kuva ku wa 1 Ukwakira 2014. Ni Album yahaye umwanya! Yayikozeho mu buryo bw’amajwi, yiyandikira buri ndirimbo iyigize, ayungurura amajwi n’ibindi byakomeje iyi Album y’indirimbo zihimbaza Imana.

Album ye yumvikanaho indirimbo ze bwite, n’izo yakoranye n’abandi bahanzi. Ziriho ubutumwa Imana yanyujije muri we bureba abagenzi bagana ijuru.

Igizwe n’ibihangano by’umwuka bikumbuza abazabyumva ijuru ndetse no kureka ibyaha ‘bagahindukirira Uwiteka’.

Ubwo yasohoraga iyi album, yavuze ko imuha icyizere ko abanyarwanda bazakira neza ubutumwa bukubiyemo kandi bukagira umumaro uhambaye muri bo mu gihe cyabwo ‘buhindure benshi kandi bukangure n’abaguye.

Iyi Album ‘Inyanja’ igizwe na Mini-Album eshanu, iya mbere yayise ‘Inyanja I (Uwiteka Abyemeye), ‘Inyanja II’, Inyanja III’, ‘Inyanja IV’ na ‘Inyanja V’. Ikubiyeho indirimbo ziri mu njyana nyinshi Pop, Afro beat, R&B, Slow, Soul, Hip Hop, Gakondo, Zouk, Kizomba n’izindi.

Migambi yabaye Producer by’umwuga kuva mu 2013, ari naryo pfundo ry’umuziki we. Muri iyo myaka yasohoye indirimbo yitwa ‘Njya ntekereza’ atashyize ku rubuga rwa Youtube, ariko zimwe muri Radio za Gikirisitu zirayicuranga.

Migambi avuka mu muryango w’abanyamuziki, kuri Se Mukeshabatware Dismas, umunyabigwi mu bakinnyi b’ikinamico ndetse no kwamamaza. 

Yambaye hafi mu rupfu rwa Data! Migambi avuga ku mukobwa bagiye kurushinga

Umuhanzi Migambi Gilbert agiye gukora ubukwe n'umukunzi we Abera Ishimwe Cynthia bamaze imyaka ibiri bakundana 

Migambi avuga ko uyu mukobwa yamubaye hafi mu bihe byo kubura umubyeyi we byatumye yiyemeza kubana nawe 

Migambi avuga ko Cynthia afite indangagaciro zihariye zituma asobanura byose kuri we 

Migambi yavuze ko umunsi wa mbere uyu mukobwa amubwira Yego wabaye uw'urwibutso ku buzima bwe

 

Uyu mukobwa aherutse gusoza amasomo muri Kaminuza y’u Rwanda Ishami ry'Ubumenyi n'Ikoranabuhanga (UR-CST, yahoze yitwa KIST)

KANDA HANO WUMVE INDIRIMBO 'LONELY' YA MIGAMBI NYAWE