USA: New York yasubijeho kwambara agapfukamunwa kubera ubwiyongere bwa Covid-19

Ni nyuma y'igihe kitari gito Leta Zunze Ubumwe za Amerika zarakuyeho zimwe mu ngamba zo guhangana n'icyorezo cya Covid-19 zirimo nko kwambara agapfukamunwa no guteranira mu ruhame bitewe nuko iki cyorezo cyari kimaze kugabanuka ndetse hari n'umubare mwinshi w'abantu bamaze kwikingiza. 

Hashize iminsi hirya no hino ku isi havugwa ko Covid-19 yongeye kugarukana ubukana ndetse ko hagiye gusubizwaho ingamba zo kuyirwanya zari zarakuweho, umujyi wa New York ukaba wafashe iya mbere mu gusubizaho amabwiriza ya Covid-19.

Mu itangazo ryashyizwe hanze mu masaha macye ashize rivuye mu buyobozi bw'umujyi wa New York ryakanguriye abawutuyemo n'abawugenderera ko kwambara agapfukamunwa ari itegeko ndetse ko ntawemerewe gusohoka mu rugo rwe atakambaye. 

Kujya mu isoko, mu mudoka za rusange, mu materaniro y'abantu benshi ndetse n'aherekanirwa filime, n'ahandi hahurira abantu benshi byagizwe itegeko ko ari ukwambara agapfukamunwa mu gihe ugiye muri ibi bikorwa nk'uko iri tangazo ryabivuze.

Meya wa New York Eric Adams yasobanuye impamvu hasubijweho kwambara agapfukamunwa

Mu kiganiro umuyobozi mukuru w'umujyi wa New York witwa Eric Adams yagiranye n'ikinyamakuru The New York Times yatangaje impamvu zatumye bagarura itegeko ryo kwambara agapfukamunwa.

Meya Eric Adams yagize ati ''Covid-19 ikomeje kwiyongera muri Leta Zunze Ubumwe za Amerika cyane cyane mu mujyi wa New York. Hari abantu 55% bamaze kwandura Covid-19 kandi 30% ni abo muri New York. Ni ingenzi ko twongera gusubizaho kwambara agapfukamunwa ku bantu bose yaba abikingije n'abatarikingiza kugira ngo dukumire ikwirakwira rya Covid-19''.

Abatuye umujyi wa New York basabwe kwambara agapfukamunwa

Umujyi wa New York wasubijeho kwambara agapfukamunwa bitewe nuko Covid-19 yongeye gukaza umurego, wanatangaje ko mu minsi iri imbere haratangizwa gahunda yo gukingira abana bari hagati y'imyaka 5 na 11. Aya mabwiriza New York iyashyizeho nyuma yuko hari n'ibindi bice byo muri Aziya birimo nk'Ubuyapani byasubijeho kwambara agapfukamunwa, mu Bushinwa naho baherutse gushyiraho "Guma mu Rugo".