Jado Castar yatawe muri yombi akurikiranyweho kuba nyirabayazana watumye u Rwanda rusezererwa mu mikino Nyafurika rwakiriye

Kuri uyu wa Mbere tariki ya 20 Nzeri 2021, ni bwo Jado Castar yafashwe ndetse ubu akaba afungiye kuri Sitasiyo ya Kicukiro y’Urwego rw’Igihugu rw’Ubugenzacyaha, RIB.

RIB ivuga ko Bagirishya akekwaho gukoresha inyandiko mpimbano kugira ngo akore akazi ke.

Ifatwa rye rikurikira ihagarikwa ry’ikipe y’igihugu ya Volleyball y’abagore mu Rwanda muri Shampiyona ya Volleyball iherutse gusozwa i Kigali itwawe na Cameroon, nyuma y'uko Nigeria yatanze ikirego ko u Rwanda rwakinishije Abanya-Brazil bakiniye ikindi gihugu (Brazil).

Umuvugizi wa RIB, Thierry Murangira, yatangarije The New Times ko Bagirishya akekwaho kuba yarakoresheje inyandiko mpimbano mu gukoresha imirimo ye. Murangira yagize ati: "Iperereza rikomeje kwerekana uruhare rw’abandi bagize iryo shyirahamwe".

Ibirego byari bishingiye ku gukinisha abakinnyi bane bakomoka muri Brazil bivugwa ko bakinishijwe mu buryo bunyuranyije n'amategeko, abo ni Aline Siqueira, Apolinario Caroline Taiana, Mariana Da Silva na Moreira Bianca Gomes.

Minisiteri ya siporo mu Rwanda, ku cyumweru yasohoye itangazo rivuga ko igiye gukora iperereza ku ihagarikwa ry'ikipe y'u Rwanda. Ishyirahamwe mpuzamahanga ry'umukino wa Volleyball ntabwo riratangaza ibihano ryafatiye iry'u Rwanda kubera ibyo birego.

Gusezererwa kw'ikipe y'u Rwanda kwateye uburakari abafana bamwe bavuze ko abakoze amakosa bakojeje isoni igihugu, ndetse banasaba ko abarebwa n'icyo kibazo bose bakuroikiranwa bakabiryozwa.

Uretse kuba ari umuyobozi mu Ishyirahamwe Nyarwanda rya Volleyball, Bagirishya asanzwe ari umunyamakuru w’imikino ukundwa na benshi mu Rwanda.

Jado Castar yatawe muri yombi azira gukoresha impapuro mpimbano