As Kigali itsinze Etincelles FC ihita ifata umwanya wa gatatu

Ikipe ya AS Kigali niyo yinjiye mu mukino mbere kuko ku munota wa 26’ nibwo Twizeyimana Onesme yaboneye iyi kipe y’umugi wa Kigali igitego gifungura amazamu.Nyuma y’iminota itanu gusa usanzwe ari myugariro w’iyi kipe ariko kuri uyu munsi wakinaga asatira aciye ku ruhande rw’iburyo Iradukunda Eric yaje kubonera iyi kipe igitego cya kabiri ku munota wa 31’ w’umukino.

11 ba AS Kigali babanje mu kibuga

Amakipe yombi yahise ajya mu karuhuko AS Kigali ya Eric Nshimiyimana iri imbere n’ibitego 2 ku busa bwa Etincelles Fc itozwa na Seninga Innocent.

Mu gice cya kabiri ikipe ya Etincelles yaje yisubiyeho itangira gusatira, ibintu byatumye AS Kigali itangira gushaka uko yakugarira irinda ibitego 2 yari ifite.Gusa ntibyatinze kuko Ntwali Evode yahise abaca muri humye abonera AS Kigali igitego cya gatatu (3-0) mu mukino wari ugeze ku munota wa 70’.

Mu kanya katarambiranye Etincelles FC yikoze mu isunzu irasatira bikomeye bituma Ndayisenga Ramadhan ayibonera igitego cyo kwishyura ideni.Uku gusatira no guharanira kwishyura bbyatumye Kambale Salita Gentil wahoze muri Rayon sports ahita atsindira Etincelles FC igitego cya kabiri ku munota wa  86’ w’umukino, bityo binarangira AS Kigali icyuye amanota atatu ku bitego 3-2.

11 ba Etincelles FC babanje mu kibuga

Mu yindi mikino yabaye kuri uyu wa kabiri, ikipe ya Bugesera Fc yanyagiye Gicumbi FC ibitego 3-0 naho AS  Muhanga igwa miswi na Sunrise Fc banganya igitego 1-1.

Ikipe ya AS Kigali nyuma yo gutsinda Etincelles ibitego 3-2 yahise ifata umwanya wa gatatu n’amanota 53 inganya na Mukura VS gusa iyi kipe y’umugi wa Kigali izigamye ibitego 26 mu gihe iyi kipe y’i Huye izigamye ibitego 15.

Rayon Sports iri ku mwanya wa kabiri n’amanota 54 mu mikino 25 imaze gukina naho APR FC iyoboye urutonde n’amanota 58.

Ikipe ya Bugesera yahise ifata umwanya wa 8 n’amanota 34 kun mwenda w’ibitego 7, Gicumbi FC iraguma ku mwanya wa 7 n’umwenda w’ibiotego  4.

Dore uko imikino yarangiye ndetse n’indi izaba kuri uyu wa gatatu:

Kuwa kabiri tariki 7/6/2016

*AS Kigali 3-2 Etincelles FC

*Bugesera 3-0 Gicumbi Fc  

*AS Muhanga 1-1 Sunrise Fc 

 Kuwa gatatu tariki 7/6/2016

*Amagaju Fc vs APR Fc (Nyamagabe, 15:30’)
*Musanze Fc vs Police Fc (Nyakinama, 15:30’)
*Rwamagana City Fc vs Espoir Fc (Ferwafa, 15:30’)

Itsinda ry'abasifuzi basifuye uyu mukino hamwe n'abakapiteni b'impande zombi

Kambale Salita Gentil

Abafana bari iyanga