Igihugu cya Guinea-Conakry cyafunze imipaka igihuza n’ibihugu by'abaturanyi mbere y'uko amatora aba

Mu busanzwe Perezida wa Guinée-Conakry yari yemerewe kuyobora manda ebyiri mbere yuko iritegeko nshinga rihinduka .Nyuma yuko iri tegeko nshinga rihinduriwe byatumye Perezida Alpha Condé wa Guinée-Conakry ashobora kwiyamamariza manda ya gatatu.

Mu ntangiriro y'ukwezi gushize kwa munani, ishyaka RPG riri ku butegetsi ryamugennye nk'umukandida waryo mu matora ya perezida ateganyijwe kuba mu kwezi kwa cumi uyu mwaka. Gusa Ariko icyo gihe ntacyo yasubije kuri ubwo busabe bw'ishyaka rye nubwo nyuma yaje gutangaza ko yemeye ubusabe bw'ishyaka rye 'Rassemblement du Peuple Guinéen' (RPG) bwo kuribera umukandida-perezida kuri manda ya gatatu itavugwaho rumwe.

Kuri ubu nkuko Ibiro ntaramakuru AFP bivuga  amagambo y'umuyobozi wo muri leta ya Guinée-Conakry avuga ko iki gihugu cyafunze imipaka igihuza na Sénégal na Guinée-Bissau, mbere yuko amatora rusange aba.Uwo muyobozi utatangajwe izina yabwiye AFP ko iyo mipaka yafunzwe ku mpamvu z'umutekano.

Botche Candé, Minisitiri w'ubutegetsi bw'igihugu wa Guinée-Bissau, yavuze ko uwo mupaka wafunzwe guhera ku cyumweru, ariko minisitiri mugenzi we wo muri Guinée-Conakry ntiyabyemeje. Perezida Alpha Condé wa Guinée-Conakry, w'imyaka 82, arimo gushaka manda ya gatatu itavugwaho rumwe, mu matora rusange ateganyijwe kuba ku itariki ya 18 y'ukwezi gutaha kwa cumi.

Bwana Condé yishyingikirije itegekonshinga rishya abasha kwemererwa kurenza manda ebyiri ntarengwa kuri perezida. Ibikorwa bye byo kugerageza kugundira ubutegetsi byateje impungenge ko Guinée-Conakry igiye gukurikiza inzira imwe n'iy'ibindi bihugu bimwe byo muri Afurika aho ba perezida banze kuva ku butegetsi kandi manda zabo zararangiye.

Src:BBC