Rubavu: Itorero Iyizire n'Imboni za Vision Jeunesse Nouvelle basusurukije igitaramo nyarwanda cyakanguriye urubyiruko kuba intwali

Itorero Iyizire ribinyujije mu mbyino za Kinyarwanda zari ziganjemo ubutumwa bukangurira urubyiruko kugira ubumwe n'ubwiyunge ryafashije benshi mu bari bitabiriye igitaramo kumva neza icyo ijambo ubutwari rivuze binyuze mu mbyino zagaragayemo imyambarire ya kera, gusangirira hamwe byakorwaga kera n'indi mico yagaragazaga ubumwe mubantu.

Imboni za Vision Jeunesse Nouvelles zakinnye umukino witwa "Ese n'ubutwari?' umukino wasanishijwe n'ubuzima bwa kera aho umuntu yakoraga ikosa agahanishwa igihano cyo kunyongwa nyamara kuri ubu bisa nibyakuweho. Imboni zagerageje kwerekana ko ubutwari buharanirwa kandi umuntu ari nk'undi.

Umuyobozi w'ikigo cy'umuco cya Rubavu, Alex Hagenimana yavuze ko igitaramo nk'iki kiba kigamije kwereka urubyiruko isano iri hagati y'umuco wa kera n'uwubu ndetse ashimangira ko kuba urubyiruko rw'ubu rwamenya amateka, uko rwaharanira ubutwari n'ibindi bishobora bizabafasha gutegura neza ejo hazaza heza u Rwanda rufite. Yavuze kandi ko igiti kigororwa kikiri gito bityo ubutumwa bakwiriye ngo bizeyeko haraho buzabageza.

"Naje muri iki gitaramo cy'umuco nyarwanda kugira ngo duteze imbere umuco mu rubyiruko, ubusanzwe ikigo cyacu cyita ku rubyiruko kuba rero twahuriye aha tugahabwa ubutumwa nk'ubu ni ishema kandi tuzi ko bazazigeza ku bandi na cyane ko igiti kigororwa kikiri gito".

Bamwe mu rubyiruko rwitabiriye iki gitaramo nyarwanda bagaragarije Inyarwanda.com ibyishimo batewe n'iki gikorwa nk'uko byatangajwe na Tumukunde Fils agira aho yagize  ati" Turishimye cyane rwose batwigishije ubutwari no kwitanga nk'ikintu cy'ingenzi mubuzima"

Iki gitaramo gitegurwa n'umuryango wita ku rubyiruko mu kigo cy'umuco cya Rubavu hagamijwe guhuriza hamwe urubyiruko ndetse n'abakuze bakaganirizwa bungurana ibitekerezo ku mateka, imibereho, imyitwarire, iterambere mu gufasha urubyiruko kugira uburere bwiza ariyo ntangiriro y'ejo hazaza.

Umuyobozi w'ikigo cy'umuco cya Rubavu yifashishije urubyiruko mu gutanga igisobanuro cy'ubutwari

Frére Hagenimana Alex

Nsanzubuhoro Philemon umwe mu bateguye igitaramo akanakiyobora

Umwana wasubije neza ibyabajijwe (iburyo), uwakinnye ari ikigwari mu mboni (hagati) n'umuyobozi w'ikigo cy'umuco (ibumoso)