Andre Ayew yahembwe nk’umukinnyi mwiza w’ukwezi muri shampiyona y’u Bwongereza

Ayew urimo gukina umwaka we wa mbere muri shampiyona y’Ubwongereza avuye mu Bufaransa mu ikipe ya Marseille akigaragaza atsinda amakipe akomeye nka Chelsea na Manchester United kuri ubu yakoze amateka mu kwezi kumwe ahamaze.

Mu mukino ine amaze gukinira ikipe ye, Andre Ayew yatsinzemo ibitego bitatu anatanga umupira uvamo igitego. Ibi byamuhesheje amahirwe yo kwegukana iki gihembo gihabwa umukinnyi witwaye neza kurusha abandi muri shampiyona y’Ubwongereza.

Andre Ayew Dede yahembwe nk'umukinnyi w'ukwezi

Ni igihembo yari ahanganiyeho n’abakinnyi nka rutahizamu Bafetimbi Gomis basanzwe bakinana mu ikipe imwe nawe wigaragaje cyane ndetse n’abakinnyi babiri bakinira Manchester City David Silva na Aleksander Kolarov bafashije ikipe kwitwara neza mu mikino ine imaze gukina.

Mu magambo yabwiye itangazamakuru nyuma yo gushyikirizwa igihembo yagaragaje kwishimira intangiriro ze muri shampiyona ya mbere ku isi anavuga ko yafashe icyemezo gikwiye cyo kuva mu Bufaransa by’umwihariko avugako yahisemo ikipe nziza yizeye ko izamufasha kugera ku nzozi ze.

Manuel Pellegrin umutoza wa Manchester City yatowe nk’umutoza w’ukwezi

Ayew yashimiye cyane abafana, ubuyobozi, umutoza cyane cyane abakinnyi bagenzi be bamufashije guhita amenyera ndetse bakamurema mo ikizere ko afite ubushobozi bwo kwigaragaza nubwo ari shampiyona ikomeye cyane ndetse ijya inanira abakinnyi benshi.

Umutoza w’ukwezi wahembwe ni Manuel Pellegrin utoza Manchester City nyuma yo gufasha ikipe ye kwitwara neza atsinda imikino yose, akinjiza ibitego 10 ntihagire na kimwe atsindwa.

Yanditswe na Manzi Lema Jules