Ikipe ya Hakim Sahabo yaramanutse! Abanyarwanda bakina hanze bitwaye gute mu Cyumweru gishize?

Duhereye muri shampiyona y'icyiciro cya mbere muri Afurika y'Epfo, ku wa Gatandatu ikipe ya Kaizer Chiefs ikinamo Ntwari Fiacre yatsinzwe na Golden Arrows 2-1.

‎‎Uyu mukinnyi w'Amavubi ntabwo yigeze akoreshwa kuri uyu mukino nk'uko bisanzwe. Kugeza ubu Kaizer Chiefs iri ku mwanya wa 8 ku rutonde rwa shampiyona ikaba izasubira mu kibuga ikina na TS Galaxy ku wa Gatandatu w'icyumweru gitaha.

‎‎Ku Cyumweru ikipe ya FC Zira ikinamo Mutsinzi Ange yo muri shampiyona y'icyiciro cya mbere muri Azerbaijani yatsinze Samaxi 3-0.  Uyu myugariro w'Amavubi ntabwo yigeze akinishwa gusa yari ku ntebe y'abasimbura.

‎‎Kugeza ubu ikipe ya FC Zira iri ku mwanya wa 2 ku rutonde rwa shampiyona ikaba izasubira mu kibuga ikina na Qarabag ku Cyumweru.

‎‎Muri iyi shampiyona kandi ku munsi w'ejo ikipe ya Sabail FK ikinamo Nshuti Innocent yanganyije na Kapaz 1-1.

‎‎Uyu rutahizamu w'ikipe y'igihugu y'u Rwanda, Amavubi, ntabwo yabanje mu kibuga ariko yinjiyemo asimbuye ku munota wa 58.

‎Sabail FK ikomeje kuba ku mwanya wa nyuma ku rutonde rwa shampiyona ikaba izasubira mu kibuga ikina na Turan Tovuz ku wa Gatandatu.

‎‎Muri shampiyona y'icyiciro cya mbere mu Bubiligi,ku wa Gatandatu ikipe ya Beerschot ikinamo Hakim Sahabo yatsinzwe na Sint-Truidense V.V 1-0 mu mikino y'amakipe arwana no kutamanuka no kutamanuka. Uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. 

‎‎Ikipe ya Beerschot yahise imanuka muri shampiyona y'icyiciro cya kabiri dore ko mu mikino 5 isigaye itaba yabashije kubona amanota yatuma itamanuka. Iyi kipe yari yatiye Hakim Sahabo mu kwezi kwa Mbere ngo ayifashe kurwana n'ubizima none bikaba birangiye byanze izasubira mu kibuga ikina na Cercle Brugge ku wa Gatandatu.

‎‎Muri shampiyona y'icyiciro cya kabiri mu Bubiligi, ku wa Gatandatu ikipe ya Raal La Louviere ikinamo Samuel Gueulette yatsinze Jong Genk 1-0.

‎‎Uyu mukinnyi w'Amavubi yabanje mu kibuga ndetse yewe ntabwo yigeze asimbuzwa.  Raal La Louviere iri ku mwanya wa 3 ku rutonde rwa shampiyona ikaba izasubira mu kibuga ikina na Francs Borains ku Cyumweru.

‎‎Muri shampiyona y'icyiciro cya kabiri muri Leta zunze ubumwe z'Amerika, ku wa Gatandatu ikipe ya Rhode Island ikinamo Kwizera Jojea yatsinzwe na Loudoun United FC 2-0.

‎Uyu mukinnyi w'Umunyarwanda ntabwo yari yabanje mu kibuga ariko yinjiyemo asimbuye ku munota wa 46.

‎‎Rhode Island iri ku mwanya wa 10 ku rutonde rwa shampiyona izasubira mu kibuga ikina na Oakland Roots ku wa Gatandatu.

‎‎Andi makipe nka Zed FC yo mu Misiri ikinamo Rafael York, Al Ahli Tripoli ikinamo Manzi Thierry na Bizimana Djihad zo zizasubira mu kibuga muri iki Cyumweru nyuma yo kuva mu mikino y'amakipe y'ibihugu.

Ikipe ya Beerschot ikinamo Hakim Sahabo yamanutse muri shampiyona y'icyiciro cya kabiri 

Samuel Gueulette yafashije ikipe ye ya Raal La Louviere kubona amanota 3