‎Umunya-Uganda, Ssekiganda Ronald mu nzira zinjira muri APR FC

Nk'uko amakuru abivuga ikipe y'Ingabo z'igihugu yamaze kumvikana n'uyu mukinnyi aho biteganyijwe ko azayerekezamo mu mpeshyi y'uyu mwaka.

‎‎Ssekiganda Ronald utazirwa NG'olo Kante  bijyanye nuko akina asanzwe akina mu kibuga hagati yugarira mu ikipe ya SC Villa yo muri shampiyona y'icyiciro cya mbere muri Uganda.

‎‎Asanzwe anakinira ikipe y'igihugu ya Uganda guhera mu mwaka ushize aho amaze kuyikinira imikino 10 akaba yaratsinzemo igitego 1.

‎‎Uyu mukinnyi w'imyaka 22 yatangiye gukina ruhago muri 2015 ahereye Lweza FC y'iwabo muri Uganda ayimaramo umwaka umwe nyuma akomereza muri Proline FC yo yamazemo imyaka ibiri.

‎‎Muri 2018 yerekeje muri Express Football Club ayivamo muri 2020 yerekeza muri KCCA ari nayo yavuyemo yerekeza muri SC Villa muri 2021.

‎‎Ntabwo ari uyu mukinnyi ukomoka muri Uganda bivugwa ko ashobora kwerekeza muri APR FC  gusa kuko hari n'undi witwa Allan Okello ukinira Vipers SC aho we akina mu kibuga hagati afasha gusatira.

‎‎Nawe akinira ikipe y'igihugu ya Uganda dore ko aheruka no kuyitsindira igitego mu mukino uheruka bari bakinnyemo na Guinée mu gushaka itike y'igikombe cy'Isi cya 2026.

‎‎Mu gihe aba bakinnyi bakwerekeza muri APR FC, bazahasanga abandi Banya-Uganda aribo; Hakim Kiwanuka na Denis Omedi na  Taddeo Lwanga.

‎

Ssekiganda Ronald ari mu nzira zimwinjiza muri APR FC 

Allan Okello nawe ashobora kwerekeza muri APR FC