Perezida Trump yahaye gasopo abakomeje kugaragaza impungenge ku ihungabana ry’bukungu bw’Amerika

Mu mpera z’icyumweru gishize, Trump yashyize ku rubuga rwe rwa Truth Social inkuru yari ifite umutwe ugira uti: “Nimuceceke ku giciro cy’amagi – Trump arimo kurokora abaguzi babarirwa muri za miliyoni”, yanditswe n’umunyapolitiki wo mu ruhande rw’aba-republicains Charlie Kirk.

Impamvu y’izamuka ry’ibiciro by’amagi

Mu nkuru ye, Kirk yavuze ko igiciro cy’amagi cyazamutse cyane mu cyumweru gishize bitewe no gutakaza agaciro kw’ifaranga (inflation) n’icyorezo cy'ibicurane by’inkoko gikomeje gukwirakwira. Kirk yasubiyemo imvugo imaze iminsi ikoreshwa na Trump mu kumvikanisha ko iby’izamuka ry’ibiciro ari uburangare bwa Joe Biden, uwamusimbuye ku butegetsi.

Nubwo ibiciro by’ibiribwa bikomeje kuzamuka, Kirk yavuze ko Trump afite indi migambi ifasha abaturage kuzahura ubukungu. Muri 2024, Trump yari yasezeranyije ko mu gihe yatsinda amatora, azagabanya ibiciro by’ibiribwa n’ibindi bicuruzwa kuva ku munsi wa mbere ageze ku butegetsi.

Nyamara, nyuma yo kurahirira kuyobora Amerika, White House yaje kwemera ko Perezida afite ubushobozi buke bwo kugenzura zimwe mu mpamvu zitera izamuka ry’ibiciro, cyane cyane ibishingiye kuri COVID-19 n’intambara yo muri Ukraine.

Mu kiganiro n’abanyamakuru cyabaye muri Mutarama, umuvugizi wa White House, Karoline Leavitt yashyize ibibazo by’ibiciro kuri Biden, avuga ko guhera ku bicuruzwa byose byazamutse, ari we ubifitemo uruhare. Trump na we yaje gusubiramo ibyo, avugira kuri Fox News ati: “Guta agaciro kw'ifaranga byongeye kugaruka, ariko jye sinabigizemo uruhare. Maze iminsi ibiri n’igice gusa mu biro.”

Inzego z’ubuhinzi zivuga ko ikibazo kitazarangira vuba

Umuyobozi wa American Egg Board, Emily Metz, yabwiye CNN ko ibiciro by’amagi bizakomeza kuzamuka kugeza igihe ibicurane by’inkoko bizaba byaranduwe burundu.

Ati: "Ntidushaka kubabwira inkuru mbi, ariko ibi bigiye kumara igihe kirekire."

Ikigo gishinzwe ubuzima bw’amatungo n’ibihingwa (Animal and Plant Health Inspection Service) cyatangaje ko nta muti uhari w'ibi bicurane by’inkoko, bityo igisubizo cyonyine ari ugutsemba inkoko zose zanduye cyangwa zabashije guhura n’izanduye, urugendo rwari rwatangiye ku butegetsi bwa Biden.

Ibibazo by’ubukungu bikomeje gufata intera

Mu gihe Trump akomeje guhindagura politiki ye ku misoro ku bicuruzwa byinjira muri Amerika, ubukungu bwo bukomeje guhungabana, bamwe bakeka ko hashobora kubaho igihombo gikomeye.

Uwahoze ari Umunyamabanga wa Leta muri Minisiteri y’Imari, Larry Summers, yagize ati: “Mbere natekerezaga ko Amerika guhura n'ihungabana ry’ubukungu. Ubu, nubwo bitaraba 50/50, ariko biri hafi aho.”

Summers yemeje ko impamvu y’iyo mpinduka ari “politiki z’ubukungu zidasobanutse na gato.”

Ku bijyanye n’iyo ngingo, Trump na we ntashaka kuvuga ko nta gihombo cy’ubukungu gishobora kubaho, kuko yabwiye Fox News ati: “Singiye kuvuga ibiteye ubwoba, ariko hari impinduka zigenda ziba. Kuko ibyo turi gukora ni binini cyane.”