Mutsinzi yatsinze Nshuti! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri Libya ikipe ya Al Ahli Tripoli ikinamo Manzi Thierry na Bizimana Djihad, ku Cyumweru yanganyije na Al Dhahra 1-1.

Muri uyu mukino aba bakinnyi bose babanje mu kibuga ndetse nta n'umwe wigeze asimbuzwa. Kugeza ubu Al Ahli Tripoli iracyari ku mwanya wa mbere ikaba izasubira mu kibuga ikina na Al Watan kuwa Gatanu.

Muri shampiyona y'icyiciro cya mbere muri Tunisia, ejo ikipe ya Stade de Tunisien ikinamo Mugisha Bonheur yatsinze EGS Gafsa ibitego 2-1.

Uyu mukinnyi w'Amavubi yari yabanje mu kibuga ndetse nta nubwo yigeze asimbuzwa. Kugeza ubu Stade de Tunisien iri ku mwanya wa 6 ikaba izasubira mu kibuga ikina na Club Africain kuwa Kane.

Muri iyi shampiyona kandi ejo ku Cyumweru ikipe ya Olympic de Beja ikinamo Ishimwe Anicet yatsindwaga na Monastir 1-0.

Uyu mukinnyi w'Umunyarwanda ntabwo yabanje mu kibuga ariko yinjiyemo asimbuye ku munota wa 65. Kugeza ubu Olympic de Beja iri ku mwanya wa 9 ku rutonde rwa shampiyona ikaba izasubira mu kibuga ikina na Tetaouine kuwa Kane.

Muri shampiyona y'icyiciro cya mbere mu Misiri, kuwa Kabiri w'icyumweru gishize ikipe ya Zed FC ikinamo Rafael York yanganyaga na Ismaily igitego 1-1.

Uyu mukinnyi w'Amavubi ntabwo yabanje mu kibuga ndetse nta nubwo yari ku ntebe y'abasimbura. Zed FC iri kumwanya 10 ku rutonde rwa shampiyona ikaba izasubira mu kibuga ikina na El Mahalia ejo kuwa Kabiri.

Kuwa Gatandatu w'icyumweru gishize ikipe ya Kaizer Chiefs ikinamo Ntwari Fiacre yatsinze Stellenbosch ibitego 4-1 mu mukino wa 1/4 cy'Igikombe cy'igihugu.

Ntabwo uyu munyezamu w'Amavubi yari no ku ntebe y'abasimbura. Kugeza ubu Kaizer Chiefs iri ku mwanya wa 8 ku rutonde rwa shampiyona ikaba izasubira mu kibuga ikina na Cape City kuwa Gatatu.

Muri shampiyona y'icyiciro cya mbere muri Azerbaijani, ku Cyumweru ikipe ya FC Zira ikinamo Mutsinzi Ange yatsinze Sabail FK ikinamo Nshuti Innocent 1-0.

Mutsinzi Ange yari yabanjemo mu ikipe ye asimbuzwa ku munota wa 77 ndetse na Nshuti Innocent yari yabanjemo gusa nawe aza gusimbuzwa ku munota wa 67.

Kugeza ubu FC Zira iri ku mwanya wa kabiri ku rutonde rwa shampiyona ikaba izasubira mu kibuga ikina na Sabah FK kuwa Gatandatu. 

Ni mu gihe Sabail FK yo iri ku mwanya wa nyuma ku rutonde rwa shampiyona ikaba izasubira mu kibuga ikina na Neftci ku Cyumweru.

Muri shampiyona y'icyiciro cya kabiri mu Bubiligi, ku Cyumweru ikipe ya Raal La Louviere ikinamo Samuel Gueulette yanganyije na RFC Liége 1-1.

Uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu Raal La Louviere iri ku mwanya wa 3 ku rutonde rwa shampiyona ikaba izasubira mu kibuga ikina na K.Lierse S.K ku Cyumweru.

Muri shampiyona y'icyiciro cya mbere mu Bubiligi, kuwa Gatanu ikipe ya Beerschot ikinamo Hakim Sahabo yatsinzwe na Sint-Truidense V.V. ibitego 2-0.

Uyu mukinnyi w'ikipe y'igihugu y'u Rwanda, Amavubi yabanje mu kibuga ndetse nta nubwo yigeze asimbuzwa. Beerschot iri ku mwanya wa nyuma ku rutonde rwa shampiyona ikaba izasubira mu kibuga ikina na Westerlo kuwa Gatanu.

Muri shampiyona y'icyiciro cya kabiri muri Arabia Saudite, kuwa Gatanu ikipe ya Al-Kawkab ikinamo Kwizera Olivier yatsindwaga na Al-Kawkab ibitego 3-1.

Uyu munyezamu w'Umunyarwanda yari yabanje mu kibuga. Kugeza ubu Al-Kawkab iri ku mwanya wa 8 ku rutonde rwa shampiyona ikaba izasubira mu kibuga ikina na Al-Ansar ejo kuwa Kabiri.

Nshuti Innocent agerageza gushakira ikipe ye igitego 

Mutsinzi Ange ahanganye n'ikipe ikinamo Nshuti Innocent