Los Angeles hatangiye igikorwa cyo kwiyubaka nyuma y’inkongi zibasiriye Umujyi

Umujyi wa Los Angeles wahuye n’inkongi zikomeye mu kwezi kwa Mutarama 2025, zisiga ibihombo bikomeye ku baturage no ku bukungu. Izi nkongi, zatewe n’umuyaga ukaze wa Santa Ana, zahitanye abantu 29, zisenya amazu arenga 18,000, ndetse zisiga abaturage barenga 200,000 badafite aho baba.

Guverineri wa California, Gavin Newsom, yasabye Kongere y’Amerika gutanga inkunga ya miliyari 40 z’amadolari yo gufasha Los Angeles kwiyubaka. 

Iyi nkunga izafasha mu gusana ibikorwa remezo, ibitaro, amashuri, ndetse n’amazu yasenywe n’inkongi. Hari kandi gahunda yo gutanga inguzanyo ku bantu batishoboye kugira ngo bashobore kongera kubona aho baba.

Ku bufatanye bw’inzego zitandukanye, ibikorwa byo gukuraho ibisigazwa by’inkongi byatangiye mu gihe gito nyuma y’iyi mpanuka. 

Nk’uko byatangajwe n’urubuga ABC News, imirimo yo gusukura yageze kuri 80% mu byumweru bibiri gusa. Ibi byatumye abatuye ahabaye inkongi babasha gutangira ibikorwa byo kubaka bushya mu buryo bwihuse.

Abayobozi b’umujyi wa Los Angeles bafata iki gihe nk’amahirwe yo guhindura umujyi ukarushaho gukomera ku bijyanye no guhangana n’inkongi. 

Harateganywa gushyirwa imbere uburyo bwo kubaka amazu akoresha ibikoresho birwanya umuriro, gushyira ubusitani rusange bugabanya ibyago by’inkongi, no gukoresha amazi mu kurwanya umuriro mu buryo bugezweho.

Meya wa Los Angeles, Karen Bass, yahuye n’akaga k’imiyoborere ubwo yari hanze y’igihugu inkongi zibasira umujyi we. Ibi byateje impaka mu baturage ndetse bamwe mu bayobozi bagaragaza ko hakenewe uburyo bwihuse bwo gucunga ibiza.

Mu gihe Los Angeles yinjira mu cyiciro cyo kwiyubaka, hagaragajwe ingamba nshya zigamije kugabanya ibyago by’inkongi zishobora kongera kwibasira umujyi. Hari gahunda yo gushyiraho amategeko akomeye ku bijyanye no gutura no gukoresha ibikoresho birwanya umuriro.

Abaturage b’uyu mujyi, kimwe n’inzego z’ubuyobozi, bashyize imbere icyerekezo cy’ejo hazaza hatekanye, hagamijwe kwirinda ko ibiza nk’ibi byakongera kwibasira Los Angeles.

Umwanditsi : Kubwayo Jean de la Croix