Umufaransa Joris Delbove ukinira Ikipe ya Total Energies yegukanye Agace ka Kane ka Tour du Rwanda 2025 kavaga i Rusizi kerekeza i Karongi ku ntera y'ibilometero 95,1 ndetse ahita anambara umwambaro w'umuhondo.
Joris Delbove yavutse tariki ya 15 Nyakanga muri 2000, avukira mu gace ka Troyes mu Bufaransa.
Se umubyara yitwa Jimmy Delbove nawe akaba yarakinnye umukino wo gusiganwa ku magare ndetse na nyirarumwe we witwa Jérôme Delbove nawe ni uko yakinnye uyu mukino.
Joris Delbove yatangiye gukina umukino w'igare mu 2019 ahereye mu ikipe y'abatarabigize umwuga yitwa SCO Dijon. Ari muri iyi kipe yabaye uwa 3 mu batarangeje imyaka 23 muri shampiyona y'iwabo ndetse anitabira irushanwa rya cyclo cross.
Mu 2021 yerekeje mu ikipe ya St. Michel–Preference Home–Auber93 y'iwabo mu Bufaransa . Muri uyu mwaka yitabiriye isiganwa ribera iwabo mu Bufaransa rya Tour de l'Avenir maze asorezwa mu bakinnyi 10 ba mbere.
Joris Delbove yanitabiriye kandi French National Cyclo-cross Championships mu batarangeje imyaka 23 ubundi asoreza kumwanya wa kabiri.
Muri Mutarama 2022, ikipe ye yamuhisemo yitabira UCI Cyclo-Cross World Championship yabereye Fayetteville muri Arkansas.
Muri uyu mwaka yongeye kwitwara neza muri shampiyona y'abatarangeje imyaka 23 aba uwa mbere ndetse anitabira andi marushanwa aho yahaye uwa kabiri muri Bagnoles de l'Orne II,uwa kabiri muri Troyes I ,aba uwa 3 mu isiganwa rya Quelneuc II ndetse aba uwa 9 muri Tour du Finistère.
Ntabwo Joris Delbove yagize intangiriro nziza za 2023 kubera ko yagize ikibazo cy'imvune gusa nyuma yaje kuba umukinnyi mwiza mu isiganwa rya Tour de l'Ai,aba uwa 4 muri Paris -Tours, aba uwa 9 muri Tour du Limousin ndetse anarangiza ari uwa 4 muri UCI ProSeries yabereye i Paris.
Uku kwitwara neza kwatumye ikipe ye ya St. Michel–Mavic–Auber93 isoza umwaka wa 2023 iri mu makipe ahagaze neza mu Bufaransa.
Mu mwaka wa 2024 ntabwo Joris Delbove yitabiriye amarushanwa menshi kuko yitabiriye Tour Alsace ibera iwabo mu Bufaransa, aba uwa mbere ndetse anitabira Paris–Camembert aba uwa 8.
Mu ntangiriro z'uyu mwaka nibwo Joris Delbove yerekeje mu ikipe ya Total Energies y'iwabo arinayo akinamo kugeza ubu.
Tour du Rwanda ya 2025 izakomeza ku munsi w'ejo hakinwa agace ka Gatanu kazava i Rusizi kerekeza i Huye ku ntera y'ibilometero 143.
Joris Delbove wegukanye agace ka Kane ka Tour du Rwanda 2025
Eng
RSS 
TANGA IGITECYEREZO